Kryeministri Edi Rama nga konferenca në Shtëpinë e Evropës, nën titullin “Është koha për mendje të bukura!”, duke përmendur mosmarrëveshjet në rajon, ka theksuar se nën synimin e përbashkët që është BE-ja, duhet të ecet përpara.
“Falenderoj vëllezërit e motrat nga Kosova dhe partnerët nga Bosnja. Kjo është ajo që duhet të bëjmë në të gjithë nivelet pa asnjë paragjykim dhe asnjë mendim tjetër nga pas, i dimë mosmarrëveshjet, por e dimë se sa gjëra të përbashkëta kemi me njëri-tjetrin dhe sa gjëra mund të bëjmë së bashku, sa më shumë gjëra të mira të bëjmë për njerëzit, aq më shumë jemi në një vend më të mirë edhe për të zgjidhur mosmarrëveshjet, jam i sigurt, se kështu njohim njëri-tjetrin dhe bindim njëri tjetrin” – tha Rama.
Sipas kryeministrit “E shkuara është e shkuar”.
“Duhet ta trajtojmë, por duhet të shkojmë përpara e të mendojmë për fëmijët tanë, se si do të na shohin ata ne, nuk është se jemi më të mirë se prindërit, gjyshërit tanë që kanë marrë pjesë në luftëra, por ata nuk kanë qenë në pozicionin tonë, nuk kanë pasur një BE që priste për ta, lirinë për të zgjedhur, fatin e tyre në duart e tyre dhe kjo ka ndodhur për shekuj e shekuj, duke qenë të rrëmbyer nga politikat e kohës. Ne e dimë tani, kemi vetëm një drejtim BE” – tha Rama.
Duke folur për Shtëpinë e Evropës, ku u zhvillua konferenca e sotme, që sipas tij e sheh për herë të para, Rama shprehu dëshirën për të sjellë si vizitor në të edhe djalin e tij të vogël.
“Do ta sjell djalin tim të vogël që të vijë e të kuptojë se çfarë është BE, duhet të hedhim hapat me kujdes që të mos i shqetësojmë të tjerët” – tha ai.
Diskutime rreth kësaj post