“Do ikësh në të s’ëmës”, Arben Ahmetaj zbulon kërcënimin që mori në forumin e partisë: Dikush nga radhët e socialistëve promovoi mercenarë kundër meje

Ish-zv/kryeministri Arben Ahmetaj në reagimin e tij në rrjetet sociale teksa në Kuvend votohet kërkesa e SPAK për arrestimin e tij ka ndarë disa mesazhe mes rreshtash.

Ai shprehet se një vit më parë as largimit nga posti në një forum partie ka marrë kërcënim se do të ikte në të “s’ëmës”. Ahmetaj shton se dikush nga radhët e socialistëve bashkë me kundërshtarët e tyre kanë promovuar mercenarë kundër tij.

“E kam perjetuar diku me qetësi, diku me “buzëqeshje të brendshme”, diku me revoltë të brendshme, nxitimin triumfues të largimit një vit më parë, totalisht një sinjal për “të gjitha kafshët e pyllit”, kërcënimin me demek indirekt në një forum partie “se do ikja në të s’ëmës”, habinë dhe thyerjen kur mora vesh se kush nga “tanët” ( së bashku me ata që më duan të vdekur, sic tha Fevziu në Opinion përpara disa muajsh), promovuan mercenarët të shërbenin kundër meje, “marrjen peng” të bashkëjeteueses time dhe ish-bashkëshortes time, e më pas kontrollet spektakolare të emetuara si të ishin kallëpe të dala nga goja, e banesave, ku lajmi shkonte më parë në media sesa procesverbali në zyrat e institucionit, të qenit një “black falling star” në një media kombëtare që e kam dashur dhe respektuar shumë (meqë ra fjala, dhe lufta në Kosove dikur zgjati më pak në media se sa emri im servirur nga Spin Doktor/doctors si gjellë e helmuar e përditshme), pastaj disa “falanga” të dala nga kuadri i ligjit që nuhasnin gjurmët e mia. Në shume vende demokratike ku Spin doctor/doctors nuk do arrijnë të strukturojne mesazhin…kjo quhet “PËRNDJEKJE”. Ka një nen në Kodin penal, ndoshta 121, ndoshta 128”, shkruan ai.

Gjithashtu Ahmetaj thekson se i mirëkupton kolegët e maxhorancës dhe opozitës për nxitimin e treguar këtë javë, duke shtuar se politika dhe drejtësia e re kërkojnë statistika.

“Falenderoj dhe Kolegët e mi të mazhorancës dhe opozitës për nxitimin e treguar këtë javë. I “miërkuptoj” për këtë, sepse politika dhe drejtësia e re e akoma e hershme për t’u quajtur e maturuar, kërkojn statistika. Sic tha dhe avokati im “Populizmi gjyqësor e penal në ngjitje është më i rrezikshëm se sa populizmi politik, për shkak se humbet e i mungon legjitimiteti demokratik”. Avokati im në Këshillin e Mandateve citoi një thënie të vjetër nga Franca “E shoh që dy zgjidhje të mundshme ka në tavolinë, ose do të bjerë koka e mbretit, ose ju do të duhet të pranoni dështimin e revolucionit”, shton Ahmetaj.