COVID-19 në Shqipëri, ish-ministri parashikon çfarë mund të ndodhë me virusin dhe bën thirrje: Kjo gjë duhet bërë para vjeshtës

Ish-ministri i bujqësisë së LSI, Edmond Panariti thotë se askush nuk e di çfarë do të ndodhë me pandeminë e COVID-19, por Shqipëria duhet që të çojë numrin e shtretërve reanimatorë në shkallë vendi në spital, deri në 2 mijë para vjeshtës.

Më tej ish- ministri thotë se që sistemi shëndetësor mos futet në kolaps në rast vale të dytë, duhet që të sigurohen stoqe barnash antivirale si dhe stoqe rezervash ushqimore në rast të një paralize të ripërsëritu të tregtisë ndërkombëtare.

Postimi i Panaritit:

“Çfarë pritet të ndodhë me pandeminë covid-19? Ku jemi ne?

Besohet ende se rritja e ndjeshme aktuale e numrit të rasteve të reja me coronavirus në botë, përfshirë edhe vendin tonë lidhet me lehtësimin e masave karantinore dhe jo me valën e dytë të infeksionit.

Por ka që mendojnë se edhe mund të mos jetë kështu!

Por a ndodhemi në “dallgë” apo gjëndemi ende jashtë saj dhe a priten “cuname” në vjeshtë ? Mbetet për tu parë!

Si rregull epidemiologjik sa më gjatë të qarkullojë infeksioni në popullata aq më i lartë është probabiliteti i “valëve” apo “dallgëve” të reja të infeksionit.

Sipas CDC amerikane dhe Anthony Faucit të task forcës Amerikane, është e mundur që këtë vjeshtë apo prag dimri të përfshihemi nga “dallga” e dytë.

Cilat do të jenë pasojat? Askush nuk mund ta thotë.

Por shtetet po përgatiten shumë fort dhe seriozisht me kapacitete spitalore, shtretër reanimacioni, stoqe medikamentesh antiviralë. etj.

Sepse vaksina edhe nëse do të prodhohet duket ende larg.

Historia e gripit spanjoll të para 100 viteve, na kujton se vala e dytë ishte më agresive dhe vrastare se e para.

Njerëzimi mori frymë dhe u relaksua në korrik gusht të para 100 viteve për tu infektuar rëndë në tetor, nëntor.

Prandaj duhet ta çojmë numrin e shtretërve reanimatorë në spitale në shkallë vendi në 2000 deri para vjeshtës.

Që të mos futemi në kolaps në rast të një cunami infektiv të papritur.

Të sigurojmë stoqe barnash antivirale dhe stoqe rezervash bazë ushqimore në rast të një paralize të tregtisë ndërkombëtare.

Njerëzimi gjithnjë ka vuajtur nga mungesa e parashikimit.”, shkruan ai.