Çlirim Gjata zbulon rrezikun që i kanoset PD-së: Duhet të jemi të kujdesshëm

Partia Demokratike nuk rrezikon ndarjen, por shpërbërjen. Kështu deklaroi në Zona Zero në Top Neës, Çlirim Gjata.

“PD nuk rrezikohet nga ndarja, por rrezikohet nga shpërndarja, nga asgjësimi. Mënyra se si u trajtua si një opozitë e vdekur në parlament dhe më pas lëvizjet ndaj zotit Berisha…ky është një reagim për lëvizjet e zotit Basha. Ndërhyrja e Berishës u dha një kauzë demokratëve dhe shpresë dhe gjithë kjo që ka ndodhur shpëtoi partinë nga shpërbërja”, tha Gjata.

Sipas Gjatës, ky shpërthim i bazës së Partisë Demokratike, duhet të kishte ndodhur prej kohësh dhe ai thotë se po të mos kishte ndodhur foltorja, nuk do të kishte ndodhur ky shpërthim i bazës.

“Duhet ta lexojmë politikisht dhe të jemi të kujdesshëm. Askush nuk duhet të largohet nga PD dhe duhet të zgjidhet me parimin një anëtar një votë, sepse ndryshe nuk do të jemi në gjendje që të përballemi me Ramën”, tha Gjata.