Institucionet e Bashkimit Evropian (BE) duhet të paraqesin një agjendë të qartë për integrimin gradual dhe të përshpejtuar të vendeve të Ballkanit Perëndimor, me hapa konkretë zbatimi, sipas ‘non-paper’ të shtatë anëtarëve të Unionit.
Austria, Kroacia, Republika Çeke, Greqia, Italia, Sllovakia dhe Sllovenia, në një dokument që kishte qasje në të agjencia shtetërore e Malit të Zi, MINA, thuhet se ata avokojnë që Ballkani Perëndimor të mbetet lart në agjendën politike të BE-së dhe të mbështesë rrugën evropiane të rajonit.
“Ne bëjmë thirrje për fuqi të përtërirë dhe përshpejtim të procesit të anëtarësimit dhe u bëjmë thirrje institucioneve të BE-së që të paraqesin një agjendë të qartë për integrim gradual dhe të përshpejtuar me hapa konkretë zbatimi deri në vitin e ardhshëm dhe më tej, bazuar në kushte të drejta dhe rigoroze dhe në parimin e meritës”, thuhet në dokument.
Shtohet se, duke qenë se rajoni është i ekspozuar ndaj faktorëve destabilizues si ndikimi keqdashës i palëve të treta, kërcënimet hibride, keqinformimi dhe migrimi i paligjshëm, agjenda duhet të japë një shtysë të re për bashkëpunim më të thellë në fushën e Politikës së Përbashkët të Jashtme dhe të Sigurisë.
Në dokument thuhet se agjenda do të ndihmonte gjithashtu për të krijuar një shkëmbim më të rregullt dhe më të strukturuar me partnerët, pas procedurës së vendosur të BE-së, raporton rtcg.
“Meqenëse presim që partnerët tanë të qëndrojnë në anën e politikës së BE-së, ne besojmë se një dialog i tillë i zgjeruar do të thellonte kuptimin e tyre për pozicionin e BE-së”, thuhet në ‘non-paper’.
Vlerësohet se përmirësimi i bashkëpunimit do të kontribuonte në trajtimin e presioneve të jashtme dhe përballjen e narrativave ruse dhe të tjera të dëmshme në rajon që janë të papajtueshme me vlerat e BE-së dhe rendin ndërkombëtar të bazuar në rregulla.
Në një “non-paper”, shtatë anëtarë të BE-së propozuan një agjendë për bashkëpunim të zgjeruar në fushën e politikës së përbashkët të jashtme dhe të sigurisë.
Dokumenti thekson se bashkëpunimi i zgjeruar kërkon që të ftohen partnerët nga Ballkani Perëndimor në takime të paktën një herë në gjashtë muaj për diskutime joformale mbi tema me interes të përbashkët dhe për të promovuar përafrimin e plotë me Politikën e Përbashkët të Jashtme dhe të Sigurisë.
Shtohet se këtu përfshihet edhe ftesa e ambasadorëve të Ballkanit Perëndimor në takime joformale me ambasadorët e BE-së.
“Prania, dukshmëria dhe angazhimi i BE-së në rajon duhet të rritet, duke përfshirë vizita më të rregullta dhe të koordinuara, në emër të Përfaqësuesit të Lartë të BE-së për Punët e Jashtme dhe Politikën e Sigurisë”, thuhet në dokument.
Vlerësohet se dialogu me partnerët nga Ballkani Perëndimor duhet të forcohet, për shembull përmes përfshirjes së vendeve anëtare të BE-së në përgatitjen dhe promovimin e seminareve për tema të caktuara.
Në ‘non-paper’, u propozua që të ofrohen udhëzime të personalizuara të BE-së me kërkesë të partnerëve nga Ballkani Perëndimor, përpara takimeve me vendet e treta.
Shtohet se duhet të krijohen shkëmbime të rregullta dhe seminare ekspertësh për çështjet e të drejtave të njeriut, krahas aktiviteteve të vazhdueshme lidhur me zbatimin e Kapitullit 23, në mënyrë që të forcohet pjesëmarrja në fushat dhe programet tematike të BE-së.
Është vlerësuar se duhet të forcohet trajnimi i diplomatëve të rinj dhe nëpunësve civilë për njohjen me diplomacinë e BE-së dhe institucionet e BE-së.
“Për shembull, në bashkëpunim me Kolegjin e ri Evropian në Tiranë, Institutin e BE-së në Itali, Akademinë Diplomatike në Vjenë, Akademinë Diplomatike në Lubjanë, Akademinë Diplomatike të Kroacisë dhe Shkollën Rajonale për Administratën Publike në Mal të Zi”, shkruan në dokument.
Është gjithashtu e nevojshme, siç u tha, të zhvillohen ushtrime simuluese për të rritur gatishmërinë rreth sulmeve kibernetike.
Në dokument thuhet se partnerët nga Ballkani Perëndimor duhet të ftohen të vizitojnë Agjencinë e Bashkimit Evropian për Sigurinë Kibernetike, në mënyrë që të familjarizohen me sistemin e sigurisë kibernetike të BE-së dhe të promovojnë përafrimin e plotë me legjislacionin e Bashkimit.
Theksohet se komunikimi strategjik me BE-në duhet të përmirësohet, si dhe janë propozuar konsultime me partnerët nga Ballkani Perëndimor para raundit të ardhshëm të negociatave për Konventën e OKB-së për krimin kibernetik.
Shtohet se duhet të ketë diskutime të rregullta rreth sigurisë dhe mbrojtjes si dhe të zhvillohen masa të mëtejshme ndihme në kuadër të Fondit Evropian të Paqes për Ballkanin Perëndimor.
“Për shembull, për ruajtjen e sigurt të armëve dhe municioneve në Mal të Zi (përdorni sinergjinë me projektin ekzistues në terren të OSBE-së)”, thuhet në ‘non-paper’.
Diskutime rreth kësaj post