Çfarë po ndodh? Pas vizitës së Ramës, kryenegociatori i Shqipërisë takon zv.ministrin e Jashtëm grek

Kryenegociatori i Shqipërisë, Zef Mazi, ka takuar ditën e sotme zv.ministrin e jashtëm grek, Miltiadis Varvitsiotis, ku kanë diskutuar për integrimin europian të Shqipërisë.

Mazi shpreson që të mbahet sa më shpejt Konferenca e parë Ndërqeveritare, për të shprehur ambiciet e Shqipërisë për t’u integruar në BE.

Ndërkohë zv.ministri grek ka shprehur mbështetjen e Greqisë për Shqipërinë, për të heshur hapin e radhës drejt rrugës për në BE.

NJOFTIMI NGA KRYEMINISTRIA:

“Takimi Mazi-Varvitsiotis, për bashkëpunimin e mëtejshëm në procesin e integrimit

Më 16 shtator 2020, Kryenegociatori për negociatat e anëtarësimit të Shqipërisë në Bashkimin Europian, Zoti Zef Mazi, u takua me Ministrin e Jashtëm Përplotësues të Republikës Greke, Zoti Varvitsiotis.

Zoti Mazi dhe Zoti Varvitsiotis zhvilluan konsultime për bashkëpunimin e mëtejshëm në kuadrin e integrimit të Shqiperisë në Bashkimin Europian.

Dy zyrtarët e lartë diskutuan ndikimin e vendimit pozitiv të Këshillit Europian në mars 2020 për hapjen e negociatave të anëtarësimit të Shqipërisë në Bashkimin Europian. Duke e përshkruar atë si një vendim madhor, historik, për Shqipërinë, Kryenegociatori theksoi se Shqipëria vazhdon të përmbushë konkluzionet e Këshillit me përgjegjësi dhe vendosmëri edhe më të madhe për të dhënë rezultate. Ai shprehu shpresën dhe besimin se rezultatet e Shqipërisë në fushën e sundimit të ligjit do të pasohen nga vendimi i BE-së për të bërë të mundur hedhjen e hapit të rradhës në rrugën e BE-së – mbajtjen e Konferencës së parë Ndërqeveritare në kohën më të shpejtë të mundshme.

Dy bashkëbiseduesit ranë dakord të vijojnë kontaktet e ngushta, përfshirë duke mbikqyrur zbatimin e Memorandumit të Bashkëpunimit për Përshpejtimin e Procesit të Integrimit të Shqipërisë në BE, për të vazhduar diskutimin mbi çështjet e lidhura me BE-në, përfshirë mbështetjen politike për Shqipërinë për të hedhur hapin tjetër të mëtejshëm në rrugën e BE-së, si dhe për të dhënë mbështetje teknike për negociatat e ardhshme.”, thuhet në njoftimin e kryeministris.