Çështjet e ‘nxehta’ të Shqipërisë me Greqinë, studiuesi i njohur nxjerr prapaskenat dhe bën paralajmërimin e fortë

Studiuesi Redi Shehu ka folur për trysninë që Greqia po i bën Shqipërisë me marrëveshjen e detit si kush për integrimin e saj në BE.

I ftuar në emisionin Dita Jonë, Shehu u shpreh se shqiptarët kanë një problem, vendosin dinjitetin e tyre në tavolinën e diskutimeve. Këtu, ai përfshin edhe çështjen e detit me Greqinë.

“Në dekadën e fundit, disa gjëra që na takojnë, siç është e drejta jonë për të lëvizur të lirë, e drejta jonë për të gëzuar pasuritë tona, janë vënë në diskutim, në negociata. Ndoshta kjo është sëmundje shqiptare, pasi e shoh edhe në Kosovë. Sa lehtë ne shqiptarët vendosim në tryezë gjëra që kanë të bëjnë me dinjitetin tonë. Këtë nuk e shohim në asnjë nga vendet e tjera. Kështu është edhe çështja e detit. Ajo është çështje e dinjitetit dhe më pas është marrëveshje mes dy shteteve. Këtë nuk e shohim te Egjipti, Italia apo edhe Turqia, shtete të cilat nuk të falin për identitetin e tyre”, – u shpreh Shehu.

Për këtë, Shehu thekson se kjo është përgjegjësi e politikanëve tanë. “Politika shqiptare, përfaqësuesit tanë, kanë një farë përgjegjësie kur është fjala për këto çështje”.

Studiuesi shkon edhe më tej, duke bërë një analizë të situatës në vitin 2009 dhe me atë aktuale, duke theksuar se socialistët nuk do të bëjnë lëshime për detin, por për minoritetin.

“Për më tepër, ne patëm një precedent, atë të vitit 2009, ku praktikisht, sipas Gjykatës Kushtetuese, ne e dhamë detin. Pse ndodh kjo? Unë them se pushteti paska qenë shumë i fortë për ne. Në vitin 2009 pati zgjedhje, në vitin 2021 ka sërish zgjedhje. Për liberalizimin e vizave duhet të jepnim diçka, tani për marrjen e statusit çfarë duhet të japim? Unë mendoj se Greqia e pretendon një gjë të tillë. Por unë mendoj se socialistët nuk do ta japin detin. Frika ime është se socialistët do të japin minoritetin. Ka një projektligj që ka kaluar në mënyrë të fshehtë, ku thuhet se minoritetet do të vetëdeklarohen. Sipas këtij minoriteti ti thjesht mund të vetëdeklarohesh si minoritar. Këtu ka një problem. Së pari, anashkalon kushtet e njohura ndërkombëtarisht për minoritetet. Së dyti, në një vend të varfër si Shqipëria, nuk mund ta bësh me vetëdeklarim sepse… pensionet, asistenca. Për një elitë politike që e do këtë vend, nuk mund t’i japësh tjetrit një mundësi të tillë. Ne po shesim votën, mund ta bëjmë edhe me identitetin”, – u shpreh Redi Shehu.