Bledi Çuçi del me deklaratën e jashtëzakonshme: Historia u shkrua në Tiranë

Ministri i Brendshëm Bledi Çuçi ka reaguar entuziast pas finales së Konference League që u organizua në Tiranë.

Në reagimin e tij, Çuçi falenderon punonjësit e policisë së shtetit, që sipas ministrit me profesionalizëm dhe me përkushtim të jashtëzakonshëm, bënë të mundur menaxhimin pa incidente të tifozërive.

Postimi i Bledi Çuçit:

Historia u shkrua në Tiranë. Finalja e madhe shkoi më së miri dhe Shqipëria demonstroi në sytë e mbarë botës që i ka të gjitha kapacitetet për të mirëpritur e menaxhuar një event të përmasave të tilla.

Një falënderim të veçantë kam për punonjësit e Policisë së Shtetit, që falë profesionalizmit dhe përkushtimit të tyre të jashtëzakonshëm garantuan mbarëvajtjen e gjithçkaje: nga mbërritja e mijëra tifozëve në pikat kufitare, shoqërimi i tyre drejt stadiumit, grumbullimet në zonat e dedikuara dhe deri te përcjellja për t’u rikthyer sërish në vendet e tyre.

Çfarë ndodhi dje ishte një ushtrim kuptimplotë i angazhimit tuaj të përbashkët si asnjëherë më parë për të cilin keni mirënjohjen e pakufishme të të gjithëve.