Numri 2 i PS, Taulant Balla mori pjesë në Asamblenë Socialiste të Librazhdit, e organizuar kjo në kuadër të takimeve organizative parapërgatitore për zgjedhjet 2021.
Balla theksoi se bindja në fitore, nuk duhet t’i gjejë neglizhente strukturat e PS dhe se cilësia e fitores do t’i japë mundësinë Partisë Socialiste dhe Kryeministrit Rama të qeverisë vetëm në aleancë me njerëzit e thjeshtë të këtij vendi.
“Është e vërtetë që ne fitojmë, por kjo fitore nuk është e mjaftueshme nëse nuk është e thellë, për të garantuar që të qeverisim vetëm në vitin 2021”, tha Balla.
Sa i përket planit organizativ, Balla u shpreh se është e rëndësishme të vijohet në thellimin e barazisë gjinore dhe tu jepen sa më shumë hapësirë të rinjve në parti.
Në takim u diskutua edhe mbi piketat strukturore të PS për zgjedhjet e 25 Prillit 2021, ku sipas tij, Partia Socialiste do të marrë besimin për mandatin e tretë me Edi Ramën kryeministër.
“Duke respektuar të gjitha masat e domosdoshme mbrojtëse ndaj COVID-19, ne duhet të jemi në komunikim me komunitetet, sipërmarrjen, të rinjtë, fermerët, me njerëzit e thjeshtë dhe të zakonshëm. Operacioni humanitar i ndihmës për familjet në nevojë gjatë izolimit, por edhe më pas, ishte shprehje e diferencës së madhe të solidaritetit social, me ata që përqeshnin nga televizori dhe facebook-u.
Dobësia e thellë e kundërshtarit nuk duhet të na vetëkënaqë duke lënë pas dore për asnjë moment organizmin/përmirësimin e strukturës së Partisë sonë.
Partia Socialiste mbetet e vetmja forcë politike ku shumica e shqiptarëve i besojnë përgjegjësinë qeverisëse dhe aspiratën për integrim Europian.
Qasja jonë ka qenë dhe mbetet e qartë: ne duhet të vazhdojmë të qeverisim me besnikëri të madhe ndaj njerëzve të zakonshëm të këtij vendi, të cilët janë aleatët tanë të vetëm”, deklaroi Balla.
Diskutime rreth kësaj post