Kryetari i Partisë Demokratike, Sali Berisha, ka deklaruar këtë të martë se opozita po shqyrton caktimin e një proteste që pritet të zhvillohet para datës 20, duke theksuar se nuk do të tërhiqen nga ky qëndrim. Në një prononcim për mediat, Berisha foli edhe për rolin e partive politike në protesta, simbolikën e flamujve dhe nevojën për t’i dhënë fund asaj që ai e cilësoi si “narko-shtet”.
Ai theksoi se prania e flamujve partiakë nuk përbën pengesë, por frymëzim, duke shtuar se mobilizimi qytetar pa parti është i rrallë. Berisha solli si shembull protestat kundër armëve kimike, ku sipas tij, të rinjtë regjistruan një kapitull të rëndësishëm në histori.
Duke folur për çështjet ligjore që e prekin personalisht, Berisha u shpreh se nuk ka menduar të organizojë protesta para gjykatave dhe se masa e sigurisë ndaj tij ka qenë antikushtetuese, duke paralajmëruar se çështja do të legjitimohet në Strasburg.
“Ka mundësi që do të përcaktohet protesta. Por do të jetë para datës 20. Nuk heqim dorë nga kjo. Flamujt e partive, ku do të ketë dhe jashtë spektrit të këtyre familjeve, janë një frymëzim dhe jo pengesë. Nëse flamuri i partisë Mundësia ngrihen, e mbështetën atë parti. Po kështu dhe ato të PD-së. Të themi të vërtetën. Nuk është se nuk do të donim të shihnim daljen pa parti të qytetarëve në shesh, por kjo është e rrallë. Pasi nxisin partitë politike. Ndodhi me armët kimike, ku kryesisht adoleshentët dolën dhe regjistruan një kapitull të rëndësishëm në histori. Duhet të gjejmë rrugë më të mira për t’i dhënë fund narko-shtetin. Nuk më ka shkuar ndër mend që të organizoj protestë para gjykatave. Masa e parë e sigurisë ndaj meje ishte antikushtetuese, dhe ajo do të legjitimohet në Strasburg.”, tha ai.
Diskutime rreth kësaj post