Ish-kryeministri Sali Berisha ka konfirmuar se padia e tij ndaj Sekretarit Amerikan të Shtetit, Antony Blinken në Gjykatën Korreksionale të Parisit në Francë nuk është ende gati.
Edhe pse 1 ditë pasi DASH e shpalli atë dhe familjen e tij “non grata”, ish-kryeministri Berisha akuzoi zotin Blinken për shpifje dhe se me këtë të fundit do të takoheshin në gjykatë, duket se padia ndaj zotit Blinken ka mbetur pezull. Ka qenë vetë zoti Berisha, i cili e ka konfirmuar një gjë të tillë, teksa ishte duke folur në emisionin “Debat Plus” në RTV “Dukagjini” dy ditë më parë.
“Unë po bëj një betejë të ndershme për transparencë sa i takon vendimit të DASH kundër meje. Ju jeni gazetarë, bëheni një letër DASH dhe kërkon informacion për vendimin për të më shpallur mua “non grata”. Po më sollët një provë të vetme unë marr çdo vendim dhe ndëshkim që meritoj. Unë çështjen e kam çuar në Gjykatën në Francë në Paris. Avokati që sot është më i miri në botë, ka besim se për shpifjen nuk ekziston imunitet dhe se shpifja dënohet aty ku del, kështu që po merret ai me padinë”, – deklaroi ish-kryeministri Sali Berisha.
Klosi: Berisha, nuk iu hedh do hi syve shqiptarëve
Por kur kanë mbi 2 muaj nga 20 maji i këtij viti, pra dita kur Sali Berisha doli në konferencë të jashtëzakonshme shtypi dhe paralajmëroi ngritjen e një padie kundër Sekretarit Amerikan të Shtetit, Antony Blinken, një gjë e tillë është ende larg. Gazeta foli me ish-kreun e Shërbimit Informativ Shtetëror, Fatos Klosi, i cili u shpreh se Berisha po tenton që ta përdorë kallëzimin ndaj sekretarit Blinken si mburojë dhe u justifikua para qytetarëve që është i pafajshëm lidhur me akuzat ndaj tij si i përfshirë në korrupsion.
Megjithatë, në këtë pikë, zoti Klosi theksoi se ish-kryeministri Berisha nuk ka shanse që t’iu hedhë hi syve qytetarëve shqiptarë, ndërsa shtoi se është i bindur që ish-lideri demokrat nuk ka për ta fituar betejën me amerikanët. Sipas tij, Berisha po luan lojën e tij dhe kërkon që të shfajësohet me këtë vendim për të paditur numrin 1 të Departamentit Amerikan të Shtetit.
“Vendimi i Sali Berishës për të paditur për shpifje Sekretarin Amerikan të Shtetit, Antony Blinken në Gjykatën Korreksionale të Parisit është një blof. Berisha s’ka shanse të fitojë mbi amerikanët. Por fakti që ai paditi zotin Antony Blinken është më shumë lëvizje strategjike që Saliu do e përdorë për të mbrojtur veten dhe do t’u hedhë hi syve qytetarëve që ja unë e kam paditur DASH-in dhe po i sfidoj amerikanët se jam i pafajshëm dhe s’kam lidhje me aferat korruptive. Kështu që duke qenë se Berisha e di që gjyqet jashtë vendit zgjasin dhe ai gjatë kësaj kohe do ta zvarrisë punën dhe do ta përdorë këtë padi si mburojë për të mbrojtur veten, edhe pse në thelb e di që është i humbur me amerikanët. Kaq e thjeshtë është kjo punë, ua kam thënë edhe më parë”, – deklaroi ditën e djeshme ish-kreu i Shërbimit Informativ Shtetëror, Fatos Klosi gjatë një prononcimi për gazetën “SOT”.
Diskutime rreth kësaj post