Beqaj: Zgjatet afati i shpërndarjes së Kartës së Shëndetit

Beqaj: Zgjatet afati i shpërndarjes së Kartës së Shëndetit deri më 30 Prill 2016

Ministri i Shëndetësisë, Ilir Beqaj deklaron se zgjatet afati i shpërndarjes së Kartës së Shëndetit deri më 30 Prill 2016 dhe se libreza e Shëndetit mbetet në përdorim deri në pajisjen përfundimtare me Kartën e re.

Në një postim në rrjetet  Facebook dhe Twitter, pasditen e së martës, Ministri i Shqëndetësisë, Beqaj konfirmon zgjatjen e afatit të shpërndarjes së kartës së shëndetit, duke ofruar në dispozicion dhe linkun e Fondit te  Sigurimit të Detyrueshëm të Kujdesit Shëndetësor, ku njoftoi sot vendimin për zgjatjen e afatit të shpërndarjes së Kartës së Shëndetit.

Në njoftimin për mediat të Fondi i Sigurimit të Detyrueshëm të Kujdesit Shëndetësor thuhet se “Duke u bazuar në Udhëzimin nr. 33, datë 26.12.2014 “Për Kartën e Shëndetit”, i ndryshuar, afati i pajisjes me Kartën e re të Shëndetit, do të shtyhet deri më datë 30 Prill 2016. Gjatë kësaj periudhe, qytetarët mund të përdorin ende Librezën Shëndetësore, deri në pajisen përfundimtare me Kartë Shëndeti. Vendimi për zgjatjen e afatit të pajisjes me Kartën e re të Shëndetit, është një masë për të lehtësuar mbingarkesën dhe fluksin që është vënë re së fundi, pavarësisht, se vetëm për periudhën 5-11 Janar 2016, është realizuar shpërndarja e 48 mijë kartave në të gjithë vëndin duke shtuar numrin e sporteleve në Qendrat Shëndetësore, të cilat tashmë punojnë me dy turne dhe me kapacitet të plotë. Ndërkohë, gjatë vitit 2015 janë shpërndarë rreth 700 mijë Karta Shëndeti në të gjithë Shqipërinë për të gjitha kategoritë përfituese të skëmës së sigurimit shëndetësor”.

Po ashtu, shpjegohet  se “Karta e Shëndetit është një nga projektet më të rëndësishme të FSDKSH, e cila u vu në zbatim duke filluar nga Janari i vitit 2015, për të zëvendësuar gradualisht librezat e vjetra shëndetësore. Ky proces u aplikua fillimisht në disa qëndra shëndetesore në Tiranë, për t’u shtrirë më pas në të gjithë Shqipërinë.

Karta e Shëndetit përmirësoi dukshëm cilësinë e punës së mjekëve dhe farmacistëve, me përfitim të drejtpërdrejtë për pacientët. Karta e Shëndetit është i vetmi dokument zëvendësues i Librezës Shëndetësore për të gjithë qytetarët shqiptarë. FSDKSH, si institucioni që manaxhon paisjen me Kartën e Shëndetit në të gjithë territorin e vendit, e ka ndjekur me vëmendje këte proces, duke vërejtur se ky afat ka krijuar një situatë emergjente, me rradhë të gjata pranë qëndrave shëndetësore”.

“Bëjmë me dije gjithashtu, se FSDKSH do të jetë në monitorim të vazhdueshëm me qëllim zbatimin me sukses brenda afateve kohore ligjore të këtij procesi të rëndësishëm që do të përmirësojë ndjeshëm cilësinë e shërbimit shëndetësor për qytetarët” thuhet në njoftimin e FSDKSH.