Barazimi dhe pretendimet për penallti në derbi, Halili: “Ne kurrë s’do të flasim për arbitrat, janë pjesë e lojës”

Presidenti i Tiranës, Refik Halili ka folur pas barazimit pa gola në derbi me Partizanin dhe pretendimeve për 2 penallti.

Halili nuk ka gjykuar arbitrat duke thënë se edhe nëse kanë qenë penallti ky është fati dhe janë episode që ndodhin.

Ai u shpreh optimist për të ardhmen duke marrë në mbrojtje trajnerin Nevil Dede duke thënë se nuk ka pasur shumë kohë për skemat që mendon të bëjë.

Refik Halili:

“E rëndësishme është që për mua dhe për të gjithë stafin, që skuadra ka pasur goxha dëmtime, përfitoj nga rasti tiu them edhe juve të gjithëve. Ne kemi bërë vetëm 2 largime. Kobina dhe Ngo. Nuk dua të shpjegoj më gjatë sesa kaq. Kobinës i mbaronte kontrata në maj, në përfundim na ka ngelur vetëm Majkëlli. Skuadra është e plotë. Kam besim siç e kam thënë edhe vjet, futbollistët janë bashkë në grup. Do ecë do marshojë përpara. Jo për këtë ndeshje që bëri sot, por kam besim që është një skuadër e mirë. Janë kthyer disa futbollistë, por na mungojnë akoma.

I gjithë grupi i lojtarëve do të përfaqësojë bluzën në mënyrë të shkëlqyer, për të marshuar drejt objektivit, që është gjithmonë titulli kampion.

Ne kurrë s’do të flasim për arbitrat. Janë pjesë e lojës. Ka dhe gjëra që ndodhin. Në qoftë se ka qenë penallti dhe nuk është dhënë, ky ishte fati, të vazhdojmë përpara.

Ngo ka një javë që rri te ne, është e kotë të flasim. Të shikojmë çfarë negociata do kemi. Mund të jetë dhe pjesa e jonë.

Ne kemi akoma punë për të bërë. Stafi po punon, nuk ka pasur shumë kohë Nevili të bëjë skemat që ai mendon të bëjë. Shpresoj të ecim para. Futbollistët janë para dhe ne do të ecim. Oferta e Kobinës ishte 240 mijë dollarë. Nëse nuk e linim të lirë, nuk përfitonim asgjë në maj”, u shpreh Halili.