Kreu i Kadastrës, Artan Lame ditën e djeshme gjatë një konference për shtyp, i pyetur për audiopërgjimet pas 25 prillit, u shpreh se nuk heq asnjë fjalë nga ato që ka thënë. Lame tha se ndërtimet pa leje nuk mund të legalizoheshin sepse kështu do të kryente krim. Sipas tij nëse këtë do ua thoshte qytetarëve ata menjëherë do të drejtoheshin për të votuar opozitën.
“Ndërtimet pa leje që nuk mund të legalizohen, nuk mund të thuash që nuk i legalizoj. Këta njerëz në momentin që u thua këtë, bëhen mish për top për palën tjetër, domethënë ai që është në opozitë premton dhe hak me këtë. Pra, të thuash thjesht që nuk legalizoj i hedh këta njerëz në krahun tjetër. Është krim të legalizohen. Dhe kjo duhet parë si shenjë përgjegjshmërie. Jemi në 2017 aty në përgjim. Ligji i ri e trajton këtë. Ai përgjim u mbajt për ta pasur një ditë para zgjedhjeve dhe e ruajtën, e nxorën. Dhe e dyta nuk u tha që është 2017. Nuk heq asnjë fjalë nga ai përgjim”, tha Lame.
Për këtë deklaratë të Lames, ka reaguar edhe Partia Demokratike. Sekretari i Përgjithshëm Gazmend Bardhi u shpreh se veprimet e Lames janë provat që kryeministri Edi Rama ka përdorur pushtetin për qëllime elektorale. Ai tha se edhe raporti përfundimtar i OSBE/ODIHR i tregon qartë që administrata dhe legalizimet janë përdorur nga qeveria. Sipas Bardhit, drejtësia duhet të reagojë për krime të tilla zgjedhore.
“Këmbëngulja e Artan Lames për t’i cilësuar shqiptarët si mish për top, është një tjetër provë se me urdhër të Edi Ramës, administrata dhe legalizimet janë përdorur për qëllime elektorale. Këtë e thotë edhe raporti përfundimtar i OSBE/ODIHR, këtë e dinë mirë të gjithë shqiptarët. Ky krim zgjedhor, si një hallkë në zinxhirin e veprimeve korruptive dhe anti-demokratike, është një tjetër provë në duart e drejtësisë e cila nuk mund të mos veprojë, sidomos kur shkelësit e saj sfidojnë publikisht atë me qëndrimet e tyre anti-ligjore”, shprehet PD.
Diskutime rreth kësaj post