Tre persona kanë gjetur vdekjen dhe 7 të tjerë janë plagosur, njëri prej të cilëve në gjendje të rëndë, në një përleshje të armatosur të ndodhur mbrëmjen e së mërkurës në qytetin e Elbasanit.
Burime policore bëjnë të ditur se ngjarja ka ndodhur në një lokal, në zonën periferike të Krastës, pranë stadiumit “Elbasan Arena”. Disa persona kanë hapur zjarr me armë automatike në drejtim të lokalit, ku për pasojë dy persona kanë gjetur vdekjen e menjëhershme dhe 8 të tjerë janë plagosur, njëri prej të cilëve ka ndërruar jetë pak më vonë në Spitalin e Elbasanit.
Viktimat janë identifikuar si shtetasit Agron Çapja, Ardit Sinakoli, si dhe Eno Bedalli; ndërsa të plagosurit janë: Ardian Zharri,Fejzulla Çapja, Ferit e Luan Muça, Bujar Reshka, si dhe Florenc e Arnold Çapja.
Dëshmitarët thonë se ngjarja ka zgjatur pakë minuta. Sipas tyre, para lokalit ka ndaluar një automjet tip “BMW” e zezë, seria 5, nga e cila kanë zbritur dy persona. Këta të fundit kanë hapur zjarr me breshëri ndaj personave që ndodheshin brenda lokalit, pa kursyer askënd.
Sa u takon motiveve të ngjarjes, për momentin përflitet për një hakmarrje të vjetër të nisur shumë vite më parë nga familja Çapja dhe këtu janë fokusuar hetimet.
Ministri Tahiri mësohet se ka mbërritur në Drejtorinë Vendore të Policisë së Elbasanit, së bashku me Drejtorin Çako.
Forcat e policisë kanë nisur kontrollet në banesa, kanë bllokuar qarkullimin përgjatë gjithë aksit Elbasan-Librazhd, si dhe kanë ngritur postblloqe në rrugët e tjera dalëse të qytetit.
Në ndihmë të tyre kanë shkuar forcat e RENEA-s dhe ato të FNSH-së së Tiranës dhe Fierit, si dhe të komisariateve të Durrësit, Lushnjes dhe sërish Fierit.
Gjashtë prej personave të plagosur kanë mbërritur me helikopter në Tiranë, për mjekim të specializuar në Spitalin e Traumës. Nga të dhënat e fundit rezulton se 3 prej tyre ndodhen në gjendje të rëndë.
Ndërkohë, uniformat blu kanë identifikuar edhe targën e automjetit të përdorur për këtë masakër, gjë që mund të përbëjë një mundësi për të arritur tek autorët.
Diskutime rreth kësaj post