“Asnjë nën 18 vjeç nuk do të lejohet në klubet e natës”, Rama: Masat do jenë ekstreme

Pas mbledhjes së qeverisë në Kukës, Rama shpalosi sot para mediave edhe vendimet që janë marrë në të.

Ndoshta nuk do u pëlqejë shumë adoleshentëve, por Rama tha se është projektuar ligji që ua ndalon daljen në klube gjatë mësimit dhe po ashtu në mënyrë kategorike ua ndalon daljen në klubet e natës.

Për pjesën e konsumit të alkoolit dhe të frekuentimit të kafeneve gjatë mësimit Rama tha:

Ligji do të shkojë në Parlament, masat do të jenë shumë të rënda duke e bërë të pamundur tregtimin e alkoolit për ata që janë nëm 18 vjeç dhe duke sanksionuar rëndë të gjitha lokalet që do të shkelin këtë ligj dhe që të pranojnë, pra të lejojnë të hyjë nga dera e tyre vajza dhe djem nën 18-vjeç edhe gjatë orëve të mësimit. Pavarësisht nëse marrin ose jo alkool, ndëshkimet do të jenë ekstrem, sepse në besojmë që mbyllja e gjithë rrjetit të lojërave të basteve nëpër qytetet dhe zona të banuara është njëra anë, ndërsa ana tjetër është mbrojtja e adoleshentëve nga alkooli. kemi arsye të mendojmë që gjërat kanë shkuar në një pikë ku nuk mund të tolerojmë më dhe duhet një masë drastike në bashkëpunim me shkollat dhe prindërit.

Ndërsa, teksa foli për këto masa kryeministri theksoi se asnjë shtetas nën 18 vjeç nuk do lejohet në klubet e natës.

Rama tha:

Po ashtu do të ndalohet kategorikisht shkuarja në klubet e natës të shtetasve nën 18 vjeç!
Vetëm në rastet kur do të jenë të shoqëruar me prindër ose mësues, me persona që mbajnë përgjegjësi për ta, përndryshe do të jetë rreptësisht e ndaluar hyrja e tyre në klubet e natës.
Për të gjitha këto ligje do të ketë sanksione të rënda dhe do të shkohet deri në mbylljen e lokaleve deri në periudha deri në 1-vjeçare.

Lind diskutimi nëse këto masa janë cënim i lirisë individuale që i tejkalon masat e sigurisë. Fundja çdo adoleshent është nën kontrollin e dikujt, shumica të atij prindëror, por nëse nuk i kanë prindërit kanë një tjetër kujdestar që mban përgjegjësi për ta.

Mbase në parim mund të duket një ligj “i mirë”, por kur vjen puna tek masat ligjore nuk mund të flasim në rrafshin “i mirë apo i keq”, gjërat duhen parë përtej masës ndaluese.

A nuk është kjo ofenduese për prindërit, po për sistemin arsimor, po për shoqërinë?

Ndoshta parësore janë ligje të tjera që kanë ndikim ekonomik dhe jo ligje të tilla morale, duke hyrë në privatësinë e tjetrit.

Gjithsesi komentet u takojnë juve.