Ambasadori i Britanisë i përgjigjet Ramës: Bisedat private mbeten private, nuk jam i përfshirë në zgjedhje

Ambasadori i Britanisë së Madhe në Tiranë, Duncan Norman i është përgjigjur deklaratës së kryeministrit Edi Rama mbi përfshirjen e ambasadorit sa i përket zgjedhjeve.

Në një intervistë televizive lidhur me deklaratën e kryeministrit Edi Rama, ambasadori Duncan u shpreh se ai asnjëherë nuk ka qenë dhe nuk do të përfshihet në çështje të tilla. Sipas tij, nuk ka rëndësi se cila parti del fituese nga këto zgjedhje, por ai theksoi se ajo që është e rëndësishme është fakti që këto zgjedhje të jenë sipas tij të suksesshme.

“Unë nuk jam i përfshirë në zgjedhjet, unë qartësisht nuk po organizoj zgjedhjet, madje nuk ka pikë rëndësi për mua se kush i fiton zgjedhjet, por ka shumë rëndësi për mua dhe për Mbretërinë e Bashkuar që këto zgjedhje të jenë të suksesshme. Si diplomat nuk do të ishte e përshtatshme për mua për të folur për bisedat private. Nuk do ta bëja kurrë këtë. Disa njerëz e shohin këtë gjë ndryshe, por për mua çfarë thuhet në mënyrë private mbetet private”, – theksoi ambasadori i Britanisë Norman.

Ndër të tjera, Norman foli edhe sa i përket procesit të anëtarësimit të vendit në Bashkimin Europian. Për ambasadorin e Britanisë së Madhe në Tiranë, Duncan Norman, procesi i anëtarësimit të Shqipërisë në BE kërkon zgjedhje të suksesshme, ndaj dhe interesi i Mbretërisë së Bashkuar për zgjedhjet e 25 prillit është i lartë. Ai u shpreh se Britania është në mbështetje të vendit tonë në këtë proces.

“Zgjedhjet, sigurisht që janë të rëndësishme për popullin shqiptar. Kështu është dhe kështu duhet të jetë. Por zgjedhjet e suksesshme në Shqipëri janë të rëndësishme edhe për miqtë e Shqipërisë. Ne e kemi mbështetur Shqipërinë për dekada me radhë. I kemi dhënë ndihmë dhe mbështetje dhe e dëshirojmë shumë suksesin e Shqipërisë. Ne dëshirojmë ta shohim Shqipërinë të anëtarësohet në BE dhe ne si Mbretëri e Bashkuar do të bëjmë gjithë çfarë mundim për të ndihmuar Shqipërinë në këtë proces”, – deklaroi ai. Sakaq, Norman u shpreh se zgjedhjet e suksesshme sipas tij nuk janë të rëndësishme vetëm për vendin, por edhe për ndërkombëtarët.