Deputeti i Partisë Demokratike Enkelejd Alibeaj ka kërkuar procedimin penal të kryeministrit Edi Rama, lidhur me çështjen e arrestimit në SHBA të ish-zyrtarit të FBI-së Charles McGonigal.
Ndonëse zgjodhi të mos i bashkohej aksionit të opozitës brenda sallës, Alibeaj ka folur në përfundim të seancës plenare jashtë ambienteve të parlamentit, duke akuzuar Ramën si të përfshirë në një “vorbull korruptive shumë të rëndë”.
Pjesë nga deklarata e Alibeajt:
“Është shumë e turpshme, ajo që kemi kërkuar ne është një nga të drejtat elementare. Për një skandal të madh të bërë publik, bazuar në dokumenta të drejtësisë amerikane, ka dyshime që kryeministri të jetë përfshirë në një vorbull korruptive shumë të rëndë. Kryeministri ka një detyrim politik, institucional që t’i përgjigjet kërkesës për interpelancë. Faktet që kanë dalë nga dokumentat e drejtësisë amerikane i referohen atij. Janë takuar me të dhe jo me dikë tjetër. Në këto kushte, kur është në lojë imazhi i shtetit, e pakta do të ishte për të ardhur në sallën e Parlamentit dhe për të dhënë sqarime. A ka lidhje me dhënien e 25 mijë dollarë?
A është ai njeriu i cili ka ndërhyrë në këtë konflikt interesi të pastër për t’i dhënë si shpërblim një oligarku rus fusha nafte në Shqipëri? Të dhënat janë publike tashmë. Procedimi penal me emër mbiemër dhe akuza konkrete të marra nga drejtësia amerikane duhet të fillojë një orë e më parë. Ajo çfarë do të jetë sjellja e opozitës do të jetë ajo që ka bërë deri tani. Të ushtrojmë të drejtat tona në bazë të instrumentave ligjorë. Nëse ai nuk vjen, atëherë faktikisht ka ndodhur diçka, ka dy seanca që nuk vjen, nuk përgjigjet. Do të thotë se ku vend nuk ka kryeministër de facto. Unë kërkoj diçka më tepër sesa kaq, unë kërkoj procedimin penal. Ai kryeministër, nëse nuk ka ardhur sot, nuk ka ardhur për shkak të kërkesës që unë bëra për interpelancë, dhe mesa duket nuk do të vijë dhe në seanca të tjera, sepse unë dhe kolegët kemi paraqitur një kallëzim penal.”-deklaron Alibeaj.
Diskutime rreth kësaj post