Ish- nënkryetarja e Partisë Demokratike, Jozefina Topalli e ftuar në emisionin e pasdites në TV Klan, “Rudina” teksa ka komentuar situatën politike në vend është shprehur se parlamenti i shkakton një ndjenjë të thellë zhgënjimi.
“Kjo periudhë më ka dhënë mundësinë ta shoh politikën në distancë dhe të jem më realiste në vlerësimin e skenës politike shqiptare. Nëse në fillimet e këtij viti unë e ndiqja me interes të veçantë politikën, nuk mund të them se e ndjek më parlamentin e Shqipërisë. Më jep një ndjenjë zhgënjimi të thellë. Duket se ka rënë dhe më jep një ndjenjë trishtimi”, tha Topalli.
Sa i përket rikthimit në politikë, Topalli e ka lënë të hapur si mundësi, ndërsa më tej ka treguar dhe 3 arsyet për të cilat qeveria duhet përmbysur.
“Thonë që nuk duhet të thuash kurrë jo, sepse nuk i dihet se çfarë do të ndodhë. Nuk mund të them se nuk më tërheq, më tërheq për disa arsye njerëzore, më shumë se sa politike. Kur sheh se vendi po braktiset dhe shifrat janë alarmante, thu se ky është vendi ku kemi ndërtuar ëndrrat dhe nuk ka nënë në Shqipëri që do t’i ketë larg fëmijët. Kjo është një arsye e fortë për të bërë diçka për të stopuar ikjen. Është një brez i tërë që ka pikëpyetje. Historia jonë është tragjike në tërësi. Kemi kaluar momente të vështira, por prap kemi patur shpresë. Nuk kemi zbritur kurrë në dëshpërim.
Mua më duket se kjo është hera e parë. Kjo kërkon një analizë të thellë për të zbuluar pse-në. Por unë po përmbledh në tre shtylla kryesore arsyet përse kjo qeveri duhet përmbysur: mjerimi, pamundësia dhe mungesa e shpresës”, u shpreh Topalli.
Diskutime rreth kësaj post