Organet greke të rendit po analizojnë me kujdes paralajmërimet e bëra nga Agjencia e Ruajtjes se Kufijve Europiane (FRONTEX), sipas së cilës, xhihadistët e Shtetit Islamik po armatosin refugjatë që ndodhen në Europë për të organizuar dhe për të kryer sulme terroriste.
Sipas një raporti sekret të shpërndarë në shtete të ndryshme të Europës dhe kryesisht tek ato që strehojnë mijëra refugjatë si Greqia dhe Gjermania, ka shumë mundësi që elementë xhihadistë të kenë penetruar në kampet e pritjes së refugjatëve.
Duke pasur parasysh se është në interes të xhihadisteve për të kulmuar krizën e emigrimit dhe për të kthyer kundër refugjatëve popullsinë e BE-së, infiltrimi i tyre në kampet e pritjes, duke shfrytëzuar dhe trajnuar disa prej atyre që ikin nga lufta, uria dhe varfëria ekstreme dhe që kërkojnë azil është tepër i mundshëm, thekson raporti. Gjithashtu, cilësohen si më të prekshmit ndër radhët e refugjatëve, disa nga elementët e sunitëve myslimanë nga Siria.
Drejtori ekzekutiv i FRONTEX-it, Fabrice Leggeri ka kërkuar që të gjithë vendet europiane të jenë në gadishmëri të plotë ndaj sulmeve të mundshme terroriste.
Për të njëjtin rrezik kishte parlajmëruar disa javë më parë edhe EUROPOL-i, me anë të një raporti ku bënte fjalë për të paktën 300 raste prej prillit të këtij viti, kur xhihadistët u përpoqën të rekrutojnë refugjatë që ndodheshin në Europë.
Në Greqi ka më se një muaj që ka filluar të zbatohet një plan për parandalimin dhe trajtimin e fenomenit të radikalizimit të myslimanëve që ndodhen në vend, si të atyre që janë në kampet e pritjes së refugjatëve, ashtu edhe në burgjet greke, ku mbi 5% e të burgosurve janë nga vendet ku xhihadistët kanë rritur ndikimin e tyre si Siria, Algjeria, Iraku, Maroku dhe Libia.
Diskutime rreth kësaj post