Kryeministri grek Aleksis Tsipras ka zhvilluar një bisedë telefonike me homologun e tij shqiptar, Edi Rama.
Kështu ka raportuar pak më parë televizioni shtetëror grek ERT.
Sipas inofrmacioneve paraprake, biseda telefonike është kryer me kërkesë të kryeministrit shqiptar. Dy udhëheqësit kanë theskuar rëndësinë e përforcimit të marrëdhënieve dypalëshe, për interes të dy popujve, por edhe të rajonit në tërësi.
Kryeministri Tsipras i ka dhënë rëndësi faktit që pala greke mbetet e angazhuar në këtë përpjekje, por ka theksuar se veprimet e kohëve të fundit dhe retorika nacionaliste në rritje minojnë konsolidimin e një klime të mirëbesimit të nevojshëm për ecurinë e marrëdhënieve dypalëshe.
Në të njëjtën kohë, ai ka vënë në dukje nevojën për të gjeneruar me hapa konkretë rezultate konkrete në bashkëpunimin mes dy vendeve, fakt për të cilin Greqia ka nisur një seri iniciativash.
Tsipras ka theksuar gjithashtu se mbrojtja e të drejtave të pakicave etnike greke përbën një çështje kryesore për marrëdhëniet midis dy vendeve, por edhe një kusht themelor për ecurinë europiane te Shqipërisë.
Biseda vjen para intervistës që do të zhvillojë sonte kryeministri Rama për televizionin grek “Sky”.
Rama do të jetë personazhi kryesor i emisionit “Histori” që përbëhet nga një katërshe gazetarësh të njohur të shtypit grek dhe do të flasë për çështjet që shqetësojnë marrëdhëniet shqiptaro-greke.
Deklaratat e kryeministrit shqiptar muajt e fundit kanë zënë faqet e para të shtypit grek që nuk kanë hezituar ta cilësojnë kryeministrin e Shqipërisë si një politikan nacionalist që po mban një kurs tensioni dhe përplasje me Greqinë.
Diskutime rreth kësaj post