Tragjedi në Prizren, humb jetën motoçiklisti – ja kush është viktima

Një 32-vjeçar ka humbur jetën si pasojë e një aksidenti trafiku të ndodhur pasditen e së mërkurës në segmentin rrugor Landovicë–Gjonaj, në Prizren.

Viktima është identifikuar si **Zekë (Afrim) Qenaj**, nga fshati Romajë. Sipas informacioneve të bëra publike, aksidenti ka ndodhur pas përplasjes së motoçikletës që drejtonte 32-vjeçari me një automjet.

Zëdhënësi i Policisë së Kosovës për rajonin e Prizrenit, Shaqir Bytyqi, ka konfirmuar se policia është njoftuar për aksidentin rreth orës 18:22.

Sipas tij, patrulla policore ka dalë menjëherë në vendin e ngjarjes, ku ka mbërritur rreth orës 18:30. Ekipi mjekësor ka konstatuar vdekjen e motoçiklistit.

“Bëhet fjalë për një aksident trafiku me pasojë vdekjen. Viktima, Z.Q., i lindur në vitin 1994, nga fshati Romajë i Komunës së Prizrenit, në momentin e aksidentit ishte duke drejtuar motoçikletën”, ka deklaruar Bytyqi.

Ndërkohë, bëhet e ditur se varrimi i të ndjerit do të zhvillohet sot, në orën 16:00, në varrezat e fshatit Romajë.

Rrethanat e plota të aksidentit janë duke u trajtuar nga autoritetet përkatëse.