Kontrollet janë kryer me vendim gjykate, në kuadër të një hetimi në zhvillim nga Prokuroria e Posaçme. Deri tani nuk është bërë publik objekti i plotë i dosjes.
Tiranë – Prokuroria e Posaçme kundër Korrupsionit dhe Krimit të Organizuar (SPAK) ka kryer kontrolle në banesën e ish-Drejtorit të Përgjithshëm të Policisë së Shtetit, Ilir Proda, në kuadër të një hetimi që është në zhvillim.
Sipas raportimeve të publikuara mëngjesin e kësaj të marte, kontrollet janë autorizuar nga Gjykata e Posaçme, pas kërkesës së SPAK. Vendimi gjyqësor parashikon kontrollin e banesës, si dhe kontrollin personal të ish-kreut të Policisë së Shtetit.
Burime mediatike raportojnë se emri i Ilir Prodës është përfshirë gjatë zhvillimit të një hetimi, ndërsa deri në këto momente nuk është bërë publik objekti i plotë i procedimit dhe as pozita e tij procedurale në këtë çështje.
Në kuadër të të njëjtit hetim raportohet se kontrolle janë kryer edhe në banesat e personave të tjerë.
Deri tani nuk ka informacion zyrtar nëse gjatë kontrolleve janë sekuestruar dokumente, pajisje elektronike apo materiale të tjera që mund të kenë interes për hetimin.
Ilir Proda ka mbajtur më herët detyrën e Drejtorit të Përgjithshëm të Policisë së Shtetit.
SPAK dhe autoritetet gjyqësore pritet të japin më shumë informacion në vijim, nëse rrethanat dhe ecuria e hetimit lejojnë publikimin e detajeve të tjera.
Diskutime rreth kësaj post