Janë zbuluar planet e detajuara për një paradë të madhe ushtarake që është planifikuar të mbahej në ditëlindjen e presidentit amerikan Donald Trump, më 14 qershor, datë që përkon edhe me 250-vjetorin e krijimit të ushtrisë amerikane.
Sipas dokumenteve të siguruara nga Associated Press, në këtë paradë do të merrnin pjesë mbi 6,600 ushtarë, 150 automjete, 50 helikopterë dhe mbi 2,000 civilë. Ngjarja parashikonte gjithashtu shtatë banda ushtarake, parashutistë, automjete historike, një koncert në mbrëmje dhe fishekzjarre.
Megjithatë, ekspozimi i tankeve, obusëve dhe automjeteve të blinduara ka ngritur shqetësime të mëdha për dëmtimin e rrugëve të Uashingtonit, si dhe për sigurinë dhe kostot logjistike.
Presidenti Trump ka kërkuar një paradë të tillë që prej vitit 2017, pas pjesëmarrjes së tij në paradën e Ditës së Bastiljes në Francë. Por, ngjarja u anulua për shkak të tejkalimeve të mëdha të kostove, me një vlerësim që arrinte në 92 milionë dollarë.
Planet e fundit përkojnë me përgatitjet e ushtrisë për të festuar jubileun e saj, ndërsa dokumentet zbulojnë sfida të mëdha organizative: strehimi dhe ushqimi i mijëra ushtarëve, si dhe kostot e transportit të pajisjeve dhe mjeteve të rënda nga shtete të ndryshme.
Zëdhënësi i ushtrisë amerikane, Dave Butler, deklaroi: “Ne duam që ajo të jetë një ngjarje që i gjithë kombi feston me ne… Një paradë mund të jetë pjesë e kësaj dhe ne besojmë se do të ishte e shkëlqyer.”
Por kryebashkiakja e Uashingtonit, Muriel Bowser, ka paralajmëruar se përdorimi i tankeve në rrugët e qytetit do të sillte dëme të mëdha. “Nëse përdoren tanke, duhet të ketë miliona dollarë për riparimin e rrugëve”, tha ajo më herët.
Diskutime rreth kësaj post