‘Maksimumin e mundshëm të votave e mori në 2021’, Rama: Opozita nuk arrin dot më shumë nëse nuk del nga këneta

Gjatë një takimi me të rinjtë në Durrës, Kryeministri Edi Rama komentoi situatën politike në Shqipëri, duke shprehur një qëndrim të ashpër ndaj opozitës. Ai tha se opozita ka arritur maksimumin e mundshëm të votave në zgjedhjet e 2021 dhe se për ta, është e pamundur të marrin më shumë vota “nëse nuk dalin nga ajo kënetë.”

Rama theksoi se Partia Socialiste nuk ka arritur ende potencialin e saj të plotë.

“Maksimumi ynë është i gjithi aty në fushë për t’u arritur,” tha ai, duke theksuar se ky objektiv do të arrihet me më shumë energji dhe forcë.

Në fjalët e tij, kryeministri shprehu se opozita ka humbur terren përpara PS-së, duke shtuar se përpjekjet e saj për të ndikuar janë të paqena. “Ne jemi përpara, ata na gjëmojnë me britma, por ne do ndalojmë të flasim me ta, është pa kuptim,” u shpreh ai.

Rama gjithashtu shprehu bindjen se Shqipëria mund të hyjë në Bashkimin Europian vetëm përmes PS.