Moti i keq sjell probleme në Gjirokastër, disa zona mbeten pa energji elektrike

Moti i keq me reshje të dendura shiu që ka pushtuar vendin ditën e sotme ka shkaktuar probleme dhe në Gjirokastër. Mësohet se pasojë e reshjeve disa zona kanë mbetur pa energji elektrike. Sipas Prefekturës së Qarkut, ndërprerjet e energjisë elektrike të shkaktuara nga moti i keq janë rikuperuar në disa zona, përfshirë Pogonin dhe Dropullin e Sipërm (Bashkia Dropull), Zagorinë (Bashkia Libohovë), si dhe Lunxhërinë dhe Picari (Bashkia Gjirokastër).

Megjithatë, mungesa e energjisë vijon në njësinë administrative Kurvelesh (Bashkia Tepelenë) dhe në lagjen “Kala” të qytetit të Tepelenës. Sipas strukturave të Mbrojtjes Civile dhe Policisë Vendore në Gjirokastër, rrugët kombëtare dhe rurale mbeten të kalueshme, ndërsa furnizimi me ujë të pijshëm është i qëndrueshëm në shumicën e zonave.