Shqiptarët ndër të fundit në Evropë lidhur me shpenzimet për mish

Një raport i zhvilluar nga Eurostat sa i takon komponentëve të konsumit, tregon se shtetasit shqiptarë shpenzuan mesatarisht 385 euro për të blerë mish në vitin 2022. Kjo shumë është rreth 17% në rritje kur e krahasojmë me vitin paraardhës.

Por pavarësisht se shpenzimet për këtë produkt u shtuan, në shkallë evropiane vendi ynë renditet shumë poshtë në listën e vendeve që shpenzuan për këtë produkt. Sipas statistikave, shqiptarët listohen në 8 vendet e fundit me shpenzimet më të ulëta për mish. Më pak nga të gjithë vendet e Evropës shpenzon Turqia me 258 euro/fyrmë, e ndjekur në rend rritës nga Maqedonia e Veriut 265 euro/frymë, Bullgaria me 300 euro, Polonia me 329 euro, Hungaria me 339 euro Bosnja me 370 euro dhe Shqipëria me 385 euro.

Vendi që shpenzon më shumë për konsumin e mishit në Evropë është Luksemburgu me 790 euro/frymë. Ky pozicionim mund të jetë ndikuar dhe nga çmimi i lartë i këtij produkti aty, 2.5 herë më i shtrenjtë se në pjesë të tjera të Evropës. Mishi më i lirë në BE duke e krahasuar me mesataren e përgjithshme, është në Poloni dhe Bulgari, afërsisht 42% më pak!

Nga ana tjetër dhe në vendin tonë çmimi i mishit ka pësuar një rritje. Kjo e ndikuar dhe nga rënia e numrit të mbarështimit të krerëve të bagëtive këtu, që në mënyrë zinxhir ka sjellë uljen e prodhimit vendas. Në këto kushte, tregu është dashur që të plotësojë kërkesat me produkt importi duke bërë që për vitin 2022 rritjen më të madhe të këtyre produkeve ta kishin mishi dhe bulmeti.

E nëse restorantet po përballen me rritjen e çmimeve për bulmtin dhe mishin, e kundërta po ndodh me blegtorët të cilët po tkurrin numrin e krerëve të bagëtive për shkak të ksotos së lartë të mbajtjes së tyre. Gjithnjë e më shumë njerëz po braktisin fshatin duke sjellë që numri i fermave dhe blegtorëve të vegjël të ulet ndjeshëm.

Në 20 vitet e fundit ulja e numrit të gjëllëve ka qenë me ritme gjithnjë e më të larta duke kaluar përgjysmimin. Javët e fundit bujqit dhe fermerët e vendit janë ngritur në protesta për shkak të kushteve të vështira ku gjenden, por nuk kanë marrë asnjë përgjigje nga institucionet.