A është i gatshëm të përballet me akuzat? Berisha: Nuk kam pasur kurrë rezerva

Ish-kryeministri Sali Berisha ka folur për mediat pas një takimi në Shkodër dhe ka deklaruar se mosbindja civile do të thotë një revoltë e qytetarëve shqiptar për të flakur nga pushteti regjimin e kryeministrit Rama.

Sipas tij, Rama është i tmerruar dhe me vendimin e fundit për kërkesën “arrest shtëpie” që SPAK i ka dërguar Parlamentit po firmos fundin e tij.

Ndër të tjera, Berisha tha se demokratët nuk janë peng i askujt dhe se po luftojnë si luanë.

Pjesë nga prononcimi me gazetarët:

Berisha: Mosbindje civile, kuptoj revoltën e qytetarëve për të flakur një regjim diktatorial të bazuara në sundimin e bandave, krimit dhe drogës. Këtë nënkuptoj dhe këtë do pësojë Rama.

Jeni i gatshëm të përballeni me akuzat e SPAK?

Berisha: Nuk kam pasur kurrë rezerva të përballem me çdo lloj akuze. Kam mbrojtur Kushtetutën e vendin tim dhe interesat e qytetarëve të mi. Ai që shkel Kushtetutën bëhet pjesë e një puçi për llogari të dikujt tjetër. Mjaftohej të kërkonin autorizimin.

A po mbahen peng demokratët?

Demokratët po luftojnë sot si luanë. Shihni si është bërë Rama. Është më i tmerruar se kurrë. Një njeri që kalon nga një maskë diktatoriale në një tjetër firmos fundin e tij.