Të ushqyerit shëndetshëm nuk ka të bëjë vetëm me ushqimet e duhura që konsumojmë. Duhet të dimë të trajtojmë edhe ushqimin në kuzhinë, në mënyrë që ai të jetë i shëndetshëm dhe të mos e rrezikojë shëndetin tonë. Organizata Kombëtare e Shëndetit Publik (EODY) ka publikuar një listë me disa zakone të rrezikshme që shumë njerëz kanë në kuzhinë dhe që rrisin rrezikun e helmimit nga ushqimi.
Prekja e ushqimit pa i larë duart më parë
Mikrobet që mund të jenë në duar mund të transferohen në ushqim dhe ta kontaminojnë atë. Lani gjithmonë duart me sapun dhe ujë: Para, gjatë dhe pas prekjes të ushqimit, para se të hani dhe pas përdorimit të tualetit.
Larja e mishit para gatimit
Larja e mishit të papërpunuar, pulës, gjelit të detit mund të përhapë mikrobet në lavaman, tavolinë dhe sipërfaqe të tjera në kuzhinë. Në këtë mënyrë, ushqimet e tjera si sallatat apo frutat mund të kontaminohen. Nuk ka asnjë arsye për të larë mishin, pulën, gjelin e detit apo vezët para gatimit.
Qëroni frutat dhe perimet pa i larë më parë
Lëkura e frutave dhe perimeve mund të mbajë mikrobe. Të gjitha frutat dhe perimet duhet t’i lajmë nën ujë të rrjedhshëm, edhe nëse do t’i qërojmë.
Gatim joadekuat i ushqimit, veçanërisht kur ai është me origjinë shtazore
Ushqimet si mishi, prodhimet e detit dhe vezët janë të sigurta vetëm kur janë gatuar shumë mirë, në temperatura që nuk favorizojnë rritjen e mikrobeve. Ne mund të përdorim një termometër ushqimi për t’u siguruar që po gatuajmë ushqimin në një temperaturë të sigurt. Nëse nuk kemi termometër, gatuajmë mirë ushqimin.
Testimi i shijes ose erës së ushqimit për të kontrolluar përshtatshmërinë e tij
Mikrobet që shkaktojnë sëmundje ushqimore nuk mund të zbulohen nga shija, nuhatja apo shikimi. Shijimi edhe i një sasie shumë të vogël të një ushqimi që nuk është ruajtur siç duhet mund të shkaktojë sëmundje. Njihni kohën e rekomanduar të ruajtjes së ushqimeve, brenda të cilave ato mund të hahen në mënyrë të sigurt. Hidhni ushqimet që kanë kaluar datën e skadencës pa e shijuar. Mos hani ushqime të gatuara që janë në frigorifer për disa ditë.
Shkrirja ose marinimi i ushqimit në temperaturën e dhomës
Mikrobet mund të shumohen shpejt në temperaturën e dhomës. Sidomos pasi kuzhina është zakonisht dhoma më e ngrohtë në shtëpi. Shkrini ushqimet e ngrira duke i vendosur në frigorifer, mikrovalë ose nën ujë të ftohtë të rrjedhshëm. Gjatë marinimit, vendosini ushqimet e marinuara në frigorifer derisa të jenë gati për t’u gatuar, pavarësisht nga lloji i marinatës që përdorni.
Diskutime rreth kësaj post