Në prezantimin e buxhetit të ri dhe në dëgjesën me grupet e interesit, kryebashkiaku Erion Veliaj u shpreh se ai është 10 herë më i lartë se sa ai vitit 2015. Sipas tij, sot metropoli shqiptar është më i sigurt dhe më i zhvilluar.
“Ne i qëndrojmë besnikë parimeve që kemi ndjekur çdo vit, në këto 8 vite, dhe do të vazhdojmë diskutimet e buxhetit me të njëjtin zell, me të njëjtën transparencë dhe Sigurisht, me të njëjtën dëshirë për t’u vetëkorrigjuar dhe për të bërë disa punë më mirë”.
Ndryshe nga vite më parë, të ardhurat e Tiranës do të jenë nga turizmi.
“Në vitin 2015 turizmi nuk sillte as 1% të të ardhurave të Tiranës. Njësoj edhe me teknologjinë e informacionit. Sot diskutojmë që, tek Piramida, 4000 çuna e goca kalojnë çdo muaj për të mësuar zanatet e së ardhmes. Zanatet e së ardhmes nuk do jenë më fasoneria, këpucë edhe këmisha. Punët e së ardhmes janë të gjitha digjitale. Po ashtu, jetojmë në një Tiranë ku është rritur vlera e pronës. Ajo rritet kur një qytet ka më shumë rregull, pastërti, aktivitete, por edhe shumë të huaj. A e dini se rreth 1100 apartamente në Tiranë janë blerë nga ukrainasit, që erdhën për të kaluar ditët e vështira të Luftës këtu? Unë besoj se vlera e pronës është diçka që e kanë prekur të gjithë”.
Edhe në vitin 2024, buxheti i ri do t’i kushtojë vëmendje shtresave sociale, ku sipas Veliajt, Tirana është qyteti model për zgjidhjen e problemeve të strehimit dhe menaxhimit të emergjencave.
“Janë trajtuar me kredi të butë 3.651 familje, çifte të reja, që kanë blerë apartamentin e tyre dhe jetojnë në Tiranë. Për bonusin e strehimit, jemi ndoshta i vetmi qytet që e bëjmë, ndërkohë janë trajtuar në total 2307 familje, të cilave Bashkia e Tiranës u paguan qiranë e shtëpisë, në pamundësi që ata ta mbulojnë vetë me çmimet e tregut. Kemi gjetur zgjidhjen më dinjitoze për 3.337 familje të mbetura pa strehë nga tërmeti, të cilat kanë përfituar po ashtu nga bonusi i qirasë”.
Për 2800 familje do të vazhdojë të japë bonusin social, ndërsa mbi 24 mijë personave me aftësi të kufizuara dhe me ndihmë ekonomike do të përfitojnë shërbime të Bashkisë së Tiranës.
Diskutime rreth kësaj post