Kryeministri Edi Rama, thekson se vrasja e policit në Veri të Kosovës mëngjesin e së dielës, është një këmbanë alarmi për përshkallëzimin e situatës në veri të vendit.
Kreu i qeverisë thotë se komuniteti ndërkombëtar, duhet të ulë menjëherë dhe pa kthim në tryezën e dialogut Kosovën dhe Serbinë.
Në postimin në rrjete sociale, ai thekson gjithashtu nevojën e organizimit të një konference të jashtëzakonshme paqeje, nën mbikëqyrjen e BE-së dhe SHBA-ve, por gjithashtu edhe marrjen e masave të menjëhershme me KFOR-in, për të mos lejuar përshkallëzimin e situatës pas kësaj ngjarjeje të rëndë.
Reagimi i kryeministrit Rama:
“Tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur. Kriminelët që i morën jetën një njeriu të pafajshëm, i cili shërbente nën uniformën shtetëtore të forcave të rendit të Republikës së Kosovës, duhet të dalin përpara drejtësisë.
Komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin”, shkruan Rama.
Tragjedia e humbjes së jetës së efektivit të Policisë së Kosovës është këmbana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur. Kriminelët që i morën jetën një njeriu të pafajshëm, i cili shërbente nën…
— Edi Rama (@ediramaal) September 24, 2023
