PPE rezolutë për Belerin, Rama: Jeni të painformuar

Asambleja politike e Partive Popullore Europiane miratoi një rezolutë, e iniciuar nga partia “Demokracia e Re” e kryeministrit grek Kyriakos Mitsotakis, në të cilën i bëhet thirrje autoriteteve shqiptare t’i japin mundësi Fredi Belerit të betohet si kryebashkiak i Himarës, edhe pse është i burgosur dhe po gjykohet për shitblerje të votave.

“PPE kërkon nga autoritetet shqiptare të respektojnë rezultatet e zgjedhjeve vendore të 14 Majit 2023 dhe prezumimin e pafajësisë së çdo individi të akuzuar dhe të ndërmarrin të gjitha hapat e nevojshëm – qofshin ato legjislative, administrative apo të tjera – për të siguruar që kryetari i zgjedhur të betohet”, thuhej në rezolutë.

Ndaj kësaj rezolute reagoi kryeministri Edi Rama, i cili, duke shprehur jo pak habi, thotë se qëndrimi i mbajtur nga Partitë Popullore Europiane vjen nga mungesa e informacionit dhe se rasti i Belerit, është çështje që u takon gjykatave dhe jo autoriteteve.

Edi Rama: Interesante! “Ne i bëjmë thirrje autoriteteve shqiptare”… Një thirrje pa specifikuar se për cilat autoritete dhe, me siguri, pa qenë të informuar se në këtë rast problemi nuk është rezultati i zgjedhjeve, por i gjykatave, të cilat e kanë refuzuar një kërkesë të tillë.

Kryeministri Rama thekson gjithashtu se do ishte e papranueshme nëse partitë e djathta europiane do të kërkonin një rezultat tjetër nga ai që përcaktojnë institucionet e drejtësisë.

Edi Rama: E përdora “me siguri” sepse do të ishte vërtetë tronditëse nëse Partia e madhe Popullore Europiane do të kalonte një rezolutë me titullin “Sundimi i Ligjit” për të kërkuar një rezultat tjetër nga ai që është vendosur nga Prokuroria Speciale për Korrupsionin e Krimin e Organizuar dhe Gjykatat Speciale me të njëjtën emër. Këto institucione u themeluan me mbështetje të plotë nga BE&SHBA dhe ndihmohen ngushtësisht nga SHBA&BE në punën e tyre deri këtu mbresëlënëse kundër korrupsionit dhe krimit të organizuar.

Kryeministri shprehet se nëse është e nevojshme, është i gatshëm të sigurojë udhëheqjen e lartë të PPE-së me informacion mbi këtë çështje në çdo format dhe në çdo kohë.

Shefi i qeverisë shqiptare e mbyll reagimin duke shtuar se pret mbështetje të vazhdueshme nga eurodeputetët e djathtë gjatë kësaj faze të ndryshimit historik për Shqipërinë, ku më në fund, zyrtarët e lartë po hetohen me thellësi përtej anësive politike, çka sipas tij shënon fundin e një epoke të gjatë të pandëshkueshmërisë.