Prokurorët amerikanë, shënuan një postim kërcënues në mediat sociale mbrëmë vonë nga Donald Trump dhe argumentuan se ish-presidenti mund të frikësonte dëshmitarët, duke zbuluar në mënyrë të pahijshme informacionin e klasifikuar që ka marrë nga qeveria.
Në uebsajtin e tij “Truth Social”, Trump shkroi dje, të premten mbrëma, “Nëse më keni persekutuar mua, unë do t’ju përndjek!”.
Një ditë më parë, ai ishte deklaruar i pafajshëm për akuzat se kishte orkestruar një komplot, për të tentuar të përmbyste humbjen e tij në zgjedhjet e vitit 2020 ndaj demokratit Joe Biden.
Në paraqitjen e saj në gjykatën federale në Uashington, zyra e Prokurorit Special Jack Smith, tha se regjistrimi i Trump ngre shqetësime se ish-presidenti mund të zbulojë publikisht materiale të klasifikuara, të tilla si transkriptet e jurisë së madhe, që ai ka marrë nga prokurorët.
Si pjesë e procesit, prokurorëve, u kërkohet t’u japin të pandehurve provat kundër tyre në mënyrë që ata të përgatisin mbrojtjen e tyre.
“Kjo mund të shkaktojë frikë te dëshmitarët ose të ndikojë negativisht në administrimin e drejtësisë në këtë rast”, shkruajnë prokurorët, duke vënë në dukje historinë e kaluar të Trump për të sulmuar gjyqtarë, avokatë dhe dëshmitarë në çështje të tjera kundër tij.
Pardje, e enjte, Trump deklaroi nën betim në gjykatë se nuk do t’i frikësojë dëshmitarët dhe nuk do t’i kontaktojë ata pa praninë e avokatit ligjor.
Prokurorët po kërkojnë në apelin e tyre që gjyqtarja Tanya Chatkan, të lëshojë një urdhër që ndalon Trump dhe avokatët e tij të zbulojnë personave të paautorizuar materialin që u është ofruar nga prokuroria.
Prokurorët theksuan se ishte veçanërisht e rëndësishme të kufizohej publikimi i këtij materiali, duke pasur parasysh deklaratat e Trump në mediat sociale.
Diskutime rreth kësaj post