Armelda Ago, ka ardhur nga Saranda për të ndjekur studimet në Fakultetin e Mjekësisë në Tiranë, eshtë studente në vitin e parë për infermieri të përgjithshme.
Ka qenë një dëshirë e saj që në fëmijëri, për t’u bërë pjesë e bluzave të bardha.
Megjithatë, ky pasion i saj duket se ka filluar të zbehet që në bankat e shkollës.
“Është një gënjeshtër nëse do të thosha se nuk e kam menduar edhe për jashtë. Arsyeja e parë është paga, mjekët shqiptarë janë më pak të paguarit, më pas janë dhe kushtet e punës. Unë vij nga praktika këto 2-3 javë dhe mjekët ankoheshin se po i lodhte profesioni i tyre, orët e zgjatura, mungesa e medikamenteve apo dhe mjeteve për të diagnostikuar sëmundjet”, thotë studentja.
Deklaratat e fundit të kryeministrit se studentëve të mjekësisë do t’u mbahet diploma deri në përfundim të praktikës, për të nuk është e drejtë.
“Unë po investoj në karrierën që kam zgjedhur, prindërit e mi po ashtu dhe e shikoj si një shkelje e të drejtave të studentëve duke mos i dhënë diplomën. Jam shumë dakord që të hartohen politika, të hartohen programe për mos largimin e mjekëve dhe të rinjve. Herët apo vonë kanë për t’u larguar”, shprehet ajo.
Kryeministri është shprehur se do të ketë një politikë të diferencuar të kostos dhe tarifës për ata që vendosin të qëndrojnë në Shqipëri për një periudhë të caktuar kohe. 18-vjeçaja ka një përgjigje edhe për ketë deklaratë.
“Neve nuk na është paguar asgjë deri në këto momente, madje as bursat nuk janë hedhur, që i përfitojmë nga bursa ekselencës”, thotë studentja.
Diskutime rreth kësaj post