Regjistrimi në zgjedhje, përfaqësuesi ligjor i “grupimit Alibeaj” mbërrin në KQZ, ja çfarë pritet të ndodhë

Përfaqësuesi ligjor i grupimit të Enkelejd Alibeaj ka mbërritur në KQZ, ku pritet të depozitojë aty regjistrimin e PD-së në zgjedhje.

Ky veprim ishte paralajmëruar më herët nga avokati, ku fill pas vendimit të gjykatës për vulën ai deklaroi se tashmë i hapej rrugë regjistrimit të PD-së zyrtare në KQZ për zgjedhjet lokale.

“Gjykata e Apelit pranoi ankimin e PD të drejtuar nga Alibeaj duke e kthyer çështjen për rigjykim në shkallën e parë me një tjetër trupë gjykuese, siç kërkuam. Do regjistrohemi të hënën në KQZ. Sipas statutit të PD, të gjitha organet e PD vijojnë të kenë kompetencë. Legjitimiteti i drejtimit të partisë u certifikua sot nga Gjykata e Apelit. PD ka një seli dhe është ajo zyrtarja”, tha Sefa.

Kujtojmë se Gjykata e Apelit, vendosi të premten që të mos ia kalonte vulën e PD-së ish-kryeministrit Berisha, duke pranuar ankimimin e Alibeajt dhe rikthimin e çështjes në Shkallën e Parë.