Nis seanca e dytë në Kushtetuese për Olta Xhaçkën, zbardhet kërkesa e deputetëve të Berishës

Që prej orës 13:30, ka nisur në Gjykatën Kushtetuese seanca tjetër për mandatin e deputetes të ministres së Jashtme Olta Xhaçka.

Në këtë seancë të dytë ka qenë grupimi i deputetëve të PD-së që mbështesin Sali Berishën ata që kanë dorëzuar në gjykatë kërkesën për heqjen e mandatit.

Mësohet se të pranishëm në seancë janë deputetët Agron Shehaj, Luçiano Boçi, Albana Vokshi, Oerd Bylykbashi dhe Edmond Spaho.

Përfaqësuesi ligjor i deputetëve të opozitës, Franc Nuri, deklaroi se nuk i takon Kuvendit të vendosë nëse është shkelje apo jo, por Gjykatës Kushtetsuese.

“Kuvendi ka shkelur kushtetutën duke mos e çuar çështjen ne Gjykaten Kushtetuese. Kushtetuesja duhet ta zgjidhë çështjen në themel”, tha Nuri.

Kujtojmë se opozita pretendon se mandati i deputetes së Partisë Socialiste, Olta Xhaçka është i pavlefshëm për shkak se bashkëshorti i saj ka përfituar pasuri publike me shpalljen si investitor strategjik nga Komiteti i drejtuar prej kryeministrit Rama.