Superylli i futbollit botëror, Lionel Messi po përgatitet të “shënojë” edhe jashtë fushës, duke themeluar një kompani të re që do të investojë në sport, media dhe teknologji.
Me qendër në San Francisko, Play Time Sports-Tech HoldCo do të jetë mjeti kryesor i investimit për sulmuesin shtatshkurtër argjentinas, i cili ka lënë një trashëgimi të madhe në botën moderne të futbollit.
Kompania e re, siç thuhet në një njoftim, do të kërkojë “mundësi të panjohura”, të cilat mund të përfshijnë, për shembull, mbështetjen e një kompanie fillestare në fushën e teknologjisë sportive.
“Jam i ngazëllyer për të shtrirë rrënjët e mia në Silicon Valley dhe kam besim se Play Time do të punojë me sipërmarrës të guximshëm nga e gjithë bota”, tha Lionel Messi.
Play Time do të “drejtohet” nga biznesmeni amerikan Razmig Hovaghimian, partner i kapitalit të sipërmarrjes Graph Ventures. Michael Marquez, themeluesi i Bankës së Investimeve Code Advisors, do të veprojë si këshilltar special.
“Që nga momenti që takova Lionel dhe familjen e tij në vitin 2017, ishte e qartë se kishim një vizion të fortë për të ardhmen”, tha Hovaghimian.
Deri më tani, kapitali fillestar i kompanisë së re nuk është bërë i ditur. Megjithatë, duhet theksuar se pasuria totale e Messit vlerësohet të paktën 600 milionë dollarë.
Diskutime rreth kësaj post