Zbardhen prapaskenat e shkarkimit të Gledis Nanos, përplasja me Çuçin dhe si refuzoi të jepte dorëheqjen

Prej ditësh flitej për dorëheqjen e Gledis Nanos, teksa ditën e sotme këshilli i ministrave vendosi ta shkarkojë si Drejtor të Përgjithshëm të Policisë së Shtetit.

Por me sa duket ka qenë një rrugë jo e shkurtër deri të ky vendim. Gazetarja Klodiana Lala ka zbardhur prapaskenat e këtij shkarkimi.

“Ka pasur debate të ashpra ditët e fundit mes Nanos dhe ministrit të brendshëm. Debatet mes tyre kanë qenë me tone të ashpra. Ministri i ka kërkuar dorëheqjen Nanos, por ky e ka refuzuar. Çuçi i ka lënë një afat, por nga ana e Nanos nuk e ka marrë parasysh dhe më pas ai është shkarkuar. Përplasjet mes tyre vijnë për dy arsye, së pari lidhet me situatën kriminale në vend, i cili është tronditur kohët e fundit nga disa ngjarje të rënda dhe së dyti ka të bëjë me emërimin e disa drejtuesve në policia. Z. Nano ka kundërshtuar disa emra të cilët me sa duket i janë diktuar për të drejtuar drejtori apo seksione të veçanta. Për këto dy arsye përplasjet mes tyre kanë qenë tepër të forta”, tha Lala.