Presidenti Meta homazhe për të ndjerin Bujar Nishani: Shtetari dhe politikani më serioz i dekadave

Presidenti Ilir Meta ka vlerësuar figurën e ish-presidentit Bujar Nishani, për të cilin sot po mbahen homazhe në Presidencë.

Meta tha për mediat se Nishani ishte një politikan dhe një shtetar i përgjegjshëm.

“Ndarje e dhimbshme dhe shumë e parakohshme e presidentit Nishani nga jeta… Ai nuk ishte vetëm një bashkëshort dhe prind shembullor, por pa asnjë diskutim, ishte një nga politikanët, shtetarët më të përgjegjshëm dhe më serioz të këtyre dekadave. Ai në çdo detyrë politike dhe shtetërore shkëlqeu me korrektësinë e tij dhe me integritetit e tij, me principalitetin e tij dhe konstruktivitetin që e karakterizonte, në çdo detyrë. Në mënyrë të veçantë dhe atë të presidentit, ishte një mbrojtës i shkëlqyer i interesit kombëtar dhe interesit publik dhe i demokracisë.

Në çdo detyrë ishte një mbrojtës i shkëlqyer i interesit kombëtar, i demokracisë, vlerave më të rëndësishme. Ai lë pas një trashëgimi shumë pozitive dhe një kujtim të paharruar për të gjithë ata të cilëve u shërbeu me përkushtim, besnikëri, edhe për të gjithë ata që patën një mundësi ta njihnin më pranë dhe të njihnin virtytet më të mira që ai mishëronte në personalitetin e tij human”, tha Meta.