Drejtuesja e Sekretariatit për të Përndjekurit Politikë në Partinë Demokratike, Jonila Godole, foli për kuvendin e PD, i cili u mbajt në stadiumin “Air Albania”, ku tha se një lider karizmatik si Berisha dhe me historinë e tij, është e pritshme që të kishte mbështetje të madhe.
Godole e ka cilësuar absurditet që PD të kthehet dhe të sulmojë SHBA-të dhe se kjo që po ndodh në PD, është momenti i së vërtetës dhe fillimi i një epoke të re.
Ajo u bëri thirrje demokratëve, duke folur në “News24”, që të reflektojnë, pasi sipas saj e shkuara nuk është e ardhmja e PD-së.
“Tani është e qartë që në thelb Basha nga shtatori është lider i PD-së dhe se Berisha paska qenë gjithmonë aty. Berisha më është dukur dinjitoz kur pas shpalljes “non grata” me daljen e tij zyrtare. PD është krijuar si një parti proamerikane. Kjo që po ndodh tani është absurde që PD të kthehet në këtë pozicion të sulmojë Shtetet e Bashkuara të Amerikës, kjo nuk është PD.
Nuk mund të dali PD kundër SHBA-ve. Kjo përballje nuk i shkon PD-së. Është akoma momenti për të reflektuar. I kuptoj se një pjesë e madhe janë të dëshpëruar. Nëse PD do e përdorë këtë situatë si një shans për t’u reformuar duke lënë mënjanë dualizmin me mbështetjen e SHBA-ve të kthehet në një forcë shprese. Nuk e besoj që SHBA i merr këto vendime si i Berishës shpejt. Edhe sikur të ndodhte kështu, Berisha duhej të priste. Në një moment Berisha e njësoi çështjen e tij me PD-në.
Nuk e vija në dyshim që një lider karizmatik si Berisha nuk do të kishte këtë mbështetje. Por çdo demokrat duhet të rikujtojë mbi cilat baza është themeluar PD. Duhet të kthejmë në vëmendje cilat vlera i kanë bashkuar këtë qytetarë bashkë me zhgënjimet. E shkuara nuk është e ardhmja e PD-së. Basha duhet të tregojë që tani është duke e drejtuar PD-në. Është momenti i së vërtetës dhe shpresoj të jetë fillim i i një epoke të re në PD”, u shpreh Godole.
Diskutime rreth kësaj post