Pjesa dërrmuese e demokratëve që pretendohet se kanë firmosur për Kuvendin e 11 dhjetorit, nuk kanë deklaruar publikisht mbështetjen për ish-kryeministrin Sali Berisha. Pas akuzave të Bashës se firmat nuk janë reale, Berisha nxiti delegatët që të publikojnë firmat. Por edhe pse Berisha deklaroi se ka mbledhur mbi 5 mijë firma, rezulton se pjesa dërrmuese e delegatëve e kanë refuzuar.
Ai reagoi dje duke përshëndetur 2100 firmëtarët që kanë pranuar publikisht firmosjen e formularëve. Por nga 5 mijë firma të pretenduar, duket se janë rreth 3 mijë persona që janë “zhdukur”, ç’ka rrit dyshimet se e gjitha ka qenë flluskë sapuni dhe Berisha nuk i ka pasur realisht këto firma. Ndërkohë ka shumë degë që pretendojnë se firmat janë manipuluar.
Por duket se një pjesë e këtyre firmave edhe mund të jenë falsifikuar. Drejtues të strukturës së PD-së në Rrogozhinë, kanë reaguar ndaj përmendjes së emrit si firmëtarë të Kuvendit të datës 11. Ata janë mbledhur dje në selinë lokale të PD për të diskutuar rreth asaj që ata e cilësojnë falsifikim të firmave të tyre teksa i kanë kërkuar selisë qendrore të PD-së të marrin masa. Kryetari i degës së Partisë Demokratike në Rrogozhinë, Ferdinand Saraçi u shpreh se emrat e delegatëve janë lexuar por ata nuk kanë firmosur. Saraçi u shpreh se kjo degë i është drejtuar selisë qendrore të partisë me një letër ku i kanë sqaruar problematikën e tyre teksa presin udhëzime se si do të veprohet me ata që kanë falsifikuar firmat e tyre.
Nga ana tjetër sipas burimeve ish-kryeministri duket se po lufton fort që ta kthejë Kuvendin e 11 dhjetorit në një miting, duke e mbushur kështu stadiumin jo vetëm me delegatë por edhe demokratë të tjerë. Ndërkohë pesë degët e Partisë Demokratike të Qarkut Berat zyrtarizuan ditën e djeshme listat e delegatëve për në Kuvendin e 11 Dhjetorit. Nga dega e Beratit kanë firmosur për në 11 Dhjetor, 125 nga 198 pra 63% e anëtarësisë e kësaj dege. Po kështu nga dega e Poliçanit kanë firmosur 12 nga 34 delegatë. Nga dega Dimal kanë firmosur 21 nga 46 delegatë. Nga dega e PD-së Kuçovë kanë firmosur 82 nga 102 delegatë dhe nga dega e PD-së Skrapar kanë firmosur 20 nga 33.
Nga ana tjetër delegatët që kanë kërkuar mbledhjen e Kuvendit Kombëtar në datë 11 dhjetor, janë duke shpërndarë karta, në të cilat janë të shkruara të dhënat e tyre personale, si dhe janë përdorur simbolikat e Partisë Demokratike. Lidhur me këtë reagoi edhe Sekretari i Përgjithshëm i Partisë Demokratike, Gazment Bardhi i cili u shpreh se përdorimi i të dhënave të anëtarëve të PD nuk janë autorizuar nga asnjë organ i partisë dhe kjo sipas tij tregon qartë se këto dokumente janë të falsifikuara e të paligjshme si dhe nuk përfaqësojnë Partine Demokratike.
“Në vijim të shqetësimit të shprehur nga disa anëtarë të Kuvendit Kombëtar të PDSH për përdorimin pa të drejtë të të dhënave të tyre, në një dokument që përmban simbolet e Partisë Demokratike të Shqipërisë, kam konstatuar se: Është e vërtetë që në media dhe në rrjetet sociale janë publikuar disa dokumente me simbole të PD dhe të dhënat e anëtarëve të PD dhe/ose anëtarëve të Kuvendit Kombëtar të PDSH. Këto dokumente dhe përdorimi i të dhënave të anëtarëve nuk është autorizuar nga asnjë organ përfaqësues i PD dhe për pasojë ato janë dokumente të paligjshme dhe të falsifikuara, të prodhuara nga persona të paidentifikuar dhe që nuk përfaqësojnë asnjë organ të partisë”, tha ai.
Diskutime rreth kësaj post