Spartak Ngjela: Lëvizja e Berishës është klandestine, fakti që mban sekret firmat do të thotë që ato nuk janë reale

Avokati Spartak Ngjela dje ka komentuar situatën aktuale brenda Partisë Demokratike. Ngjela u shpreh se lëvizja e ish-kryeministrit Sali Berisha për mbledhjen e firmave është një lëvizje klandestine. Ngjela u shpreh se Berisha është duke mbajtur klandestine një lëvizje e cila duhet të jetë e hapur pasi opinioni publik duhet ta dijë se kush ka firmosur. Sipas avokatit, fakti që këto firma janë mbajtur sekret do të thotë se nuk janë firma reale.

“Nuk shpall emrat që kanë dhënë firmat, kështu që është lëvizje klandestine. Firmat duhet të kishin dalë në sistem. Kam 4.200 firma do të dilte në Google. Por ajo që bëri Fiks Fare, kuptohet që këta marrin firma jashtë sistemit. Sepse për në sistem duhet të jesh anëtar i Kongresit. Basha po thërret anëtarët e Kongresit. Të shohim çdo të thonë kryetarët e degëve, që do të denoncojnë që nuk janë firma reale. Ai mban klandestine, një lëvizje që duhet të jetë e hapur. Opinioni publik duhet të di kush ka firmosur. Por fakti që mban sekret do të thotë që ato nuk janë firma reale”, tha ai.

Ngjela u shpreh se kreu demokrat Lulzim Basha duhet ti drejtohet SPAK për situatën me Berishën. Avokati tha se Berisha ka menduar se mund të ndërtonte një Kuvend fals dhe në fund të zgjidhej kryetar partie por kjo nuk funksionon kështu. Sipas tij, edhe nëse Berisha ngre një parti tjetër ajo nuk mund të njihet pasi ish-kryeministri është shpallur non grata.

“Unë nuk e di nëse do i drejtohet SPAK-ut Basha, por po iu drejtua nuk dihet se çfarë ndodh. Basha nuk është vetëm. Këto që thotë Berisha janë një avokati e vogël që nuk tregoj ku janë firmat e mia. Pse janë sekret? Janë sekret se nuk janë anëtarë të Kuvendit. Po u fut në proces penal nuk dihet se çfarë ndodh. Të dalin hapur, janë njerëz të lirë të Shqipërisë. Ai mendoi se do të bënte një Kuvend fals, do të zgjidhte strukturat, do të zgjidhej vetë kryetar i PD dhe do të punonte në vakum. PD është person juridik dhe kryetari i personit juridik është kryetari i partisë. Edhe nëse bëhet një parti tjetër, pyetja është se kush do e njohë ndërkombëtarisht? Nuk i shpëton procesit non grata, veçse e rëndon”, tha ai.