Nga Retin Toka:
E kishte menduar shumë herë se sa i madh do të ishte emocioni të luante përballë Anglisë, vendi në të cilin u lind dhe rrit. Kishte pritur padurim që ëndrra e tij të bëhej realitet, qoftë edhe disa sekonda për të shkelur në fushën e “Wembley”-it me fanelën kuqezi. Por, asgjë nga këto nuk ndodhi jo për faj të Armando Brojës, por për dëshirën e pakuptimtë të trajnerit Edi Reja.
Vitet mbi supe ndoshta i rëndojnë teknikut kuqezi që me humbjen e djeshme me siguri ka prerë biletën vetëm “vajtje” drejt Italisë. 5 gola ishin shumë për një Kombëtare që pretendimet i kishte të shkonte 30 vite para, jo pas. Koha e “qokave” te kuqezinjtë ka përfunduar, të paktën këtë duhet ta ketë kuptuar edhe ai që tentoi të bënte batutë me ata që shpikën vetë futbollin.
Me një karrierë në “fikje”, plakushi Reja u duk se u mundua të bënte të njëjtën gjë edhe me Armandon. Megjithatë dikush duhet t’i kujtojë se talenti, për të cilin flet gjithë bota, sapo është ndezur. Këmbët i bëjnë “xixa”, vështirë se dikush mund ta ndalojë. As ju mister Reja. Jo, jo nuk mundeni! Kombëtarja u mposht mbrëmë dhe ndoshta duhet të falendërojmë anglezët që e lanë me aq. Të jetë për ju, në fushë s’pati asnjë manovër, edhe një shkëndijë të Uzunit na e dhuruan si për të na ulur me këmbë në tokë, për t’iu thënë ty dhe ne, se në Angli mund të mësosh, jo të tallesh. Ndoshta e fitove “ndeshjen” tënde ose më saktë gëzove egon më lënien në tribunë të Armando Brojës.
Shpjegimin vetëm ju e keni pasi doktorët iu erdhën në hotel dhe iu treguan se ai është gati për në fushë. Lotët e atij djali na dënuan me 5 gola. Ishin nga ato që të ka mësuar dhe ai vetë. Është rritur me atë spektakël, e ka të injektuar atë dëshirë sikurse të anglezëve vetëm për të triumfuar. S’e di pse, por ju e harruat. Besoj se duhet të kesh mësuar se Broja as ndeshjen nuk e pa fare as nga tribuna. E dini arsyen? Sepse kishte frikë se do të zbriste në fushë pa lejen tënde për të treguar si luhet futbolli dhe çfarë është Kombëtarja.
Ai u largua nga Wembley me trishtimin e një djaloshi 20-vjeçar, por krenarinë e një shqiptari të madh. Nëse do të vijoni të jeni në krye të kësaj përfaqësueseje, hiqeni nga mendja. Nuk do të vijë më derisa të ketë rotacion në pankinë.
Për ndeshjen me Andorën nuk është e vërtetë se e keni dënuar ju, jo! Nuk është i rritur me mendjemadhësinë, përkundrazi është një nga djemtë më të urtë e kokën ulur në Kombtaren tonë. E thonë të gjithë, ndoshta edhe ju, por në gjuhën italiane që të mos e marrin vesh gjithë shqiptarët. Se ndryshe… Broja qëndroi në Angli dhe nuk erdhi të bashkohej në grumbullim me Kombëtaren për shkak të një problemi në kavilje. E dini mirë që mjekët e klubit të Southampton-it nuk donin të rrezikonin deri në ekz*aminimin përfundimtar. Ishte kjo arsyeja se pse talenti shqiptar s’ishte në stërvitjet me ekipin kombëtar.
Përgatitje i thënçin, pasi dhe vetë ju e dini që një grup s’mund të kualidohet e të jetë gati për 5 ditë. Ndoshta e keni harruar, por ai 20-vjeçari iu dhuroi 6 pikë në mënyrë individuale, falë aftësive të tij të jashtëzakonshme. Po flasim për një s*ulmues në pronësi të Chelsea-it që tashmë po luan si titullar absolut në Premier League.
Mister Reja, Shqipëria s’e ka luksin të tallet me të tillë talentë. Jo më kot homologu juaj, Alban Bushi, me atë që “merrni e jepni” në Kombëtare tha: “Do themi jemi nga vendi i Brojës”. Ka domethënie shumë të madhe, i nderuar. Ju, eksperti i futbollit europian, me asnjë kampionat të fituar në karrierë, e dini mirë se 60 sekonda në fushë do të ishin në shenjë respekti për atë që djaloshi bëri në këto eleminatore. Për të mos folur me nëse, ndoshta edhe mund të të kishte surprizuar me ndonjë top në rrjetën kundërshtare.
Në pension ke dalë prej kohësh, iu sugjeroj të bëni një xhiro prej Vermoshit e në Konispol. Kombëtarja nuk është pronë! Shqipëria është e gjithë shqiptarëve anë e mbanë botës. Shumë shpejt do vijë koha që Brojën do t’iu duhet ta shijoni nga televizori, qoftë edhe me fanelën kuqezi… Armando, kampion! Ngrije kokën, fshiji lotët. Fusha dhe dashuria kuqezi është e gjitha jotja!
Diskutime rreth kësaj post