Gazetari Genc Burimi u shpreh se Shqipëria ka mundësinë të përfitojë nga kjo krizë e energjisë. Duke qenë se vendi ynë varet nga reshjet për prodhim e energjisë elektrike, mund të eksportojë drejt vendeve të tjera.
Sipas zotit Burimi kjo krizë është e përkohshme dhe pritet të zgjasë deri në pranverën e vitit 2022.
“Për mendimin tim kjo është diçka e përkohshme. Shqipëria nuk varet nga gazi, Shqipëria varet nga reshjet. Shqipëria mund të përfitojë nga kriza për të eksportuar energjinë. Për mendimin tim do ketë ndikim të drejtpërdrejtë, jo në aspektin energjitik ndonëse Rama pati tone pesimiste gjatë deklaratës së tij. Kjo krizë energjie nuk e prek Shqipërinë, ajo që mund ta prekë Shqipërinë është se mund të importojë inflacion të jashtëm. Mbase kryeministri e hap këtë debat më shpejt se sa duhet sepse akoma nuk po shohim krizë në Shqipëri”, u shpreh Burimi për Ora News.
Lidhur me deklaratën e kryeministrit, i cili e cilësoi krizën “si një luftë” të njëjtë me pandeminë dhe tërmetin, zoti Burimi u shpreh se ka dy arsye. Ose Rama ka vepruar njësoj si homologët e tjerë dhe ka qenë “i detyruar” të dalë në deklaratë ose është i sigurt që Shqipëria nuk do preket nga kjo krizë dhe në fund do thotë nuk u prekëm falë menaxhimit të qeverisë.
“Meqë homologët e tij morën fjalën dhe ky u ndje i detyruar të ndjekë pak a shumë të njëjtën mënyrë si të tjerët, si me pandeminë. Arsye e dytë mund të jetë një lloj mburrjeje ngaqë Rama është i sigurt që Shqipëria nuk do preket nga kriza energjitike, bëri sikur situata është shumë e rëndë nesër kur mos prekemi të thotë nuk u prekëm falë aksionit tim si qeveri. Unë kështu e kuptoj. Ngelet një mister, presim por kjo na detyron ne gazetarëve dhe opozitën të kërkojmë shifra reale për të parë a vuan sot Shqipëria nga një krizë energjie”, tha Burimi.
Diskutime rreth kësaj post