Partia Socialiste dhe Partia Demokratike duket se po shkojnë drejt një fryme të re bashkëpunimi. Të enjten në mbrëmje kryeministri Edi Rama i shtriu dorën kryedemokratit Lulzim Basha, duke deklaruar se është i gatshëm të negociojë për gjithçka me të. Madje, zoti Rama e la të hapur idenë dhe për të ndarë qeverinë. Por derisa të shkohet te kjo e fundit mund të duhet rrugë e gjatë, prandaj pritet që bashkëpunimi të nisë me ndarjen e institucioneve të pavarura. Presidentit Ilir Meta është drejt shkarkimit, por edhe nëse Kushtetuesja nuk merr vendim, në korrik të 2022 atij i mbaron mandati. PS e ka bërë të qartë se presidenti do të zgjidhet në bashkëpunim me opozitën. Pra do të kemi një emër që do të zgjidhet me konsensus, me shumë gjasë një figurë neutrale nga jashtë sistemit politik. Por vitin që vjen ka dhe shumë institucione që duhet të përditësohen me drejtues dhe të gjithë duhet të emërohen nga Kuvendi, ku pritet të kemi një tjetër bashkëpunim PD-PS.
Gazeta ka skanuar disa institucione, krerët e të cilëve iu përfundon mandati së shpejti dhe që pritet që të bëjë bashkë Partinë Demokratike dhe Partinë Socialiste. Kështu, institucioni i parë është Banka e Shqipërisë. Aktualisht ky institucion drejtohet nga Guvernatori Gent Sejko. Por këtij të fundit i mbaron mandati në shkurt të vitit 2022 dhe nuk është çudi që emri i ri të propozohet nga PD-ja. Kjo do të thotë se nëse për pasuesin e Metës në krye të Presidencës mund të kemi konsensus Rama-Basha edhe për emrin e guvernatorit të ri mund të kemi dakordësi mes palëve. Ndërkohë, një institucion tjetër që pritet të çojë palët drejt një “armëpushimi” është Avokati i Popullit. Aktualisht në krye të këtij institucioni është Erinda Ballanca. Zonjës Ballanca i mbaron mandati në krye të AP në maj të vitit 2022. Mirëpo, ajo është katapultuar në këtë post në maj të vitit 2017 dhe u desh pakti Rama-Basha që ajo të vishte kostumin e Avokates së Popullit të Shqipërisë. Kështu që duke qenë se deri më tani ky institucion i është besuar Partisë Demokratike, nuk përjashtohet mundësia që sërish të drejtohet nga një demokrat ose demokrate.
Por përveç Presidentit të Republikës, Guvernatorit të Bankës së Shqipërisë dhe Avokatit të Popullit, edhe kreu i Autoritetit të Konkurrencës pritet të bëjë bashkë PD-në dhe PS-në. Mandati i kreut të këtij institucioni përfundon vitin tjetër, pra në 2022 dhe nuk përjashtohet mundësia që kryeministri Edi Rama t’i lërë dorë të lirë kreut të Partisë Demokratike, Lulzim Basha, në mënyrë që të jetë partia e drejtuar nga ky i fundit që të propozojë kreun e ri të Autoritetit të Konkurrencës. Pra, kjo do të thotë se janë gati 4 institucione të rëndësishme që Rama pritet t’ia japë Bashës. Nga ana tjetër, janë edhe disa fusha të tjera për të cilat, shefi i qeverisë mund të negociojë dhe bëhet bashkë me shefin e selisë blu, si emërimi i kreut të ri të Radio Televizionit Publik Shqiptar, reforma zgjedhore dhe ajo territoriale, apo anëtarët e rinj të Këshillit të Lartë Gjyqësor dhe Këshillit të Lartë të Prokurorisë. Kështu që nisur nga kjo analizë, pritet që të shikojmë një pakt të ri Rama-Basha, si ai i 17 majit të vitit 2017, ku kryesocialisti i dha kryedemokratit drejtimin e disa institucioneve.
Institucionet që PS mund t’i japë PD-së:
1- Presidenti i Republikës.
2- Guvernatori i Bankës së Shqipërisë.
3- Avokati i Popullit.
4- Autoriteti i Konkurrencës.
5- Kreun e RTSH.
Diskutime rreth kësaj post