Ditën e sotme kryeministri i vendit, Edi Rama, mblodhi kabinetin qeveritar për fjalimin përmbyllës në lidhje me mandatin e dytë. Rama shpalosi sukseset dhe punët e bëra në mandatin e tij të dytë qeverisës.
I menjëhershëm ka qenë edhe reagimi i kryetarit të Partisë Demokratike, Lulzim Basha. Ky i fundit ka bërë “bilancin” e qeverisë Rama 2, pak orë pasi kryeministri zhvilloi mbledhjen e fundit të qeverisë para nisjes së mandatit të tretë.
“Asgjë e re nga përsëritja e mashtrimeve të vjetra. Plehrat digjen në kriza mjedisore të stisura për të çuar taksat e qytetarëve te mafia e inceneratorëve, krimi gëlon prej ortakërisë me pushtetin, korrupsioni që ka kapur shtetin është i përhapur në çdo qelizë të qeverisë, varfëron dhe largon shqiptarët, të braktisur edhe në kohë pandemie me numrin më të lartë të vdekjeve në raport me popullsinë në Europë dhe paketat më të vogla ekonomike në kontinent, integrimi në të cilin mbahet peng nga dështimet e njëpasnjëshme”, shkroi Basha në rrjetet sociale.
“Ky është bilanci real i një regjimi që masakron zgjedhjet vetëm për të vjedhur familjet shqiptare. Autorët e tij duhet të ishin përpara drejtësisë për atë që u kanë bërë Shqipërisë dhe shqiptarëve në këto 8 vite, jo duke përrallosur për arritje imagjinare”.
Kreu i opozitës tha se PD “është e angazhuar për të sjellë ato zgjidhje që masakra e 25 prillit u mohoi qytetarëve, sepse asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët tanë”.
Diskutime rreth kësaj post