Analisti Mentor Nazarko ka komentuar në rubrikën ‘Opinion’ misionin e SHISH për sigurinë e brendshme. Sipas Nazarkos, misioni i SHISH për sigurinë e brendshme duket se sa është i kufizuar, dhe ky raport për korrupsionin e drejtësisë është sinjal serioz, duke shtuar se sistemi i drejtësisë është një sistem që po përjeton periudhë tranzicioni.
“Po më rritet respekti për këtë institucion të rëndësishëm të sigurisë kombëtare (SHISH). Në përfytyrimin tim misioni i tij për sigurinë e brendshme ka qenë i kufizuar për shkak të burimeve njerëzore të pakta, të financave të kufizuara. Mendoja se misioni kryesor ishte në shërbim të vendeve mike në funksion anti-terorizmi. Por jemi përballë një risie: Ky është një raport që vë gishtin mbi plagë që ne njohim e që kësaj radhe janë të përmendura zyrtarisht. Në këtë kuptim gjetjet e SHIK shërbejnë si kambanë alarmi për të vepruar ato që duhet të jenë institucione të ndjekjes të këtyre krimeve. Është një sistem që po përjeton një periudhë tranzicioni, sepse një grup njerëzish të këtij pushteti të rëndësishëm kanë momentet e fundit kur vendosin diçka. Ata kanë pasur në dorë fate individësh, të ekonomisë dhe të politikës. Në këtë periudhë tranzicioni, siç ndodh rëndom bëhen allishverishet më të mëdha. Njerëzit që mendojnë se janë çastet e fundit në atë sistem, bëjnë aferat e fundit. Dua të shpresoj se gjyqe dhe procese shembullore që do të godasin njerëz të tillë, do të mund të shërbejnë për të krijuar atë ndjenjë shpagimi që shoqëri apo shtete i krijojnë kur përballen me dukuri si kjo.”, – tha ai.
Mes të tjerash Nazarko tha se bërja publike e këtyre raporteve është sinjal goditje apo përgatitje klime për sektorin e drejtësisë.
“Ky është një pushtet që ka disa ‘kate’. Reforma në drejtësi, sjell ndryshime të ndikuara nga lart, reforma që ndikohen nga lart dhe nga Perëndimi, por ato nuk prekin njëkohësisht krejt godinën e këtij pushteti. Ama efektet spastruese do të vijnë dhe atje ku është ‘sëmundja’. Unë imagjinoj një proces, apo hetim shembullor që do të prekë këto kategori të përmendura në raport, dhe do të jepte atë ndjenjën e shpagimit, sepse drejtësia është dhe shpagim, social dhe individual. Pse ky raport është bërë publik tani?! Mund të kemi veprime, goditje edhe në këtë sektor. SHIK është strukturë që bashkëpunon me organet ligjzbatuese, si SPAK. Me SPAK kanë të përbashkët jo vetëm përgjimin e telefonave psh. Imagjinoj se mund të kemi veprime që do të prekin jo vetëm politikën, jo vetëm ‘peshqit e mëdhenj’ të saj,, por dhe sistemin gjyqësor. Pse ‘katet e larta’ të politikës janë në alarm sot?! Sepse po prishet bashkëjetesa e kalbur që ata kanë pasur me sistemin e drejtësisë, që i garantonte bashkëjetesën. Nëse do të kishim drejtësi funksionale, do të kishim rotacion më shpesh, cilësi në politikë. Bërja publike e tyre në këto momente, është sinjal, përgatitje klime pse jo në këtë sektor.”, – nënvizoi analisti.
Diskutime rreth kësaj post