Ashtu siç gazeta e paralajmëroi, Partia Demokratike mblodhi ditën e djeshme Kryesinë e PD, e cila miratoi ndryshimet në statut, të propozuara nga kryedemokrati Lulzim Basha. Miratimi i ndryshimeve statutore ishte një goditje e fortë për ish-kryeministrin Sali Berisha.
Kjo pasi lideri i PD në 11 propozimet e tij, nuk e kishte përmendur askund kufizimin e mandatit të kryetarit në rast humbjeje. Çka do të thotë se nëse Basha humb përsëri zgjedhjet nuk do të rrezikojë postin e kryetarit, përkundrazi do të vazhdojë të jetë në krye të partisë. Kjo lëvizje duket se erdhi si pasojë e një deklarate nga ish-kryeministri, i cili u shpreh se nuk do ta mohonte një rikthim në krye të partisë. Berisha u shpreh se nuk do të përjashtonte asnjë të drejtë kushtetuese dhe deklaroi se ishte konsistent në deklaratat e tij.
Për momentin hipoteza e një rokade në krye të PD-së është zero pasi Basha gëzon mbështetje nga drejtuesit e qarqeve, krerëve të degëve si dhe shumica nga deputetët janë në krah të tij. Prandaj deklaratat e Berishës duken më shumë si një shantazh sesa një synim real. Berisha në krye të partisë nuk do të sillte asgjë veçse njerëzit e tij që kryetari aktual i ka shndërruar në armiq, të cilët gjatë gjithë periudhës së zgjedhjeve qëndruan në hije. Emra si Bujar Nishani, Edith Harxhi, Arben Imami, Arben Ristani e një sërë nga mbështetësit e Berishës, ngelën jashtë partie.
Pas shpalljes “non grata” të Berishës nga DASH dhe humbjes së zgjedhjeve të 25 prillit, raportet mes kryedemokratit dhe ish-liderit demokrat janë të ftohta. Ndërkohë që kohët e fundit situata ka shkuar deri sa njerëz pranë ish-kryeministrit kanë nisur sulmet ndaj Bashës, për të treguar nëse ka marrëveshje me kryeministrin Edi Rama apo jo, pasi kjo dukej se e kishte frikësuar Berishën.
Ja pikat e miratuara:
Ndërkohë dje gjatë mbledhjes së Kryesisë u miratua analiza e humbjes në 25 prill për fazën e parë të saj, ngritja e Komisioneve të Votimit dhe Numërimit për zgjedhjet e anëtarëve të Këshillit Kombëtar në mbledhjen e datës 17 Korrik 2021 të Kuvendit Kombëtar, lista që do të propozojë Lulzim Basha për votim për kandidatët për anëtar të Këshillit Kombëtar si dhe propozimi i Lulzim Bashës për ndryshimet në Statutin e Partisë Demokratike që do t’i propozohen për miratim Kuvendit Kombëtar të Partisë. Kujtojmë që Komisioni vendosi të kalonte për miratim vetëm propozimet e bëra nga kreu i PD duke rrëzuar kështu propozimet e tjera. Propozimet në thelb kishin të përbashkët demokratizimin e PD dhe hapjen e partisë. Në 11 propozimet e kryetarit Basha për ndryshimin e statutit të PD-së parashikonte një kryesi më të zgjeruar, ku përveç kryetarit të Këshillit Kombëtar, do të zënë vend edhe drejtues të disa strukturave të tjera.
Organizimi i Këshillit Kombëtar sipas departamenteve, kandidaturat për kryetarë bashkish të propozohen nga kryetari i partisë, zgjerimi i Kryesisë së Degës së Partisë, ku do të përfshihen edhe anëtarët e Këshillit Kombëtar të PDSH. Kujtojmë se Kuvendi Kombëtar mblidhet ditën e nesërme ku pritet miratimi i 4 pikave të ditës së shtunë.
Diskutime rreth kësaj post