“Pas 21 janarit nuk e ngriti më kokën”, Arben Meçe komenton shpalljen “non grata” të Berishës

I ftuar në një interviste televizive, analisti i njohur, Arben Meçe ka komentuar vizitën e Ndihmës Sekretarit Amerikan të Shtetit Reeker në Tiranë, gjithashtu edhe vendimin për shpalljen “non-grata” të ish-kryeministrit, Sali Berisha.

Meçe u shpreh se marrëdhënia mes ShBA-ve dhe Berishës u thye më 21 Janar 2011, në momentin që ai u cilësua burrë shtetit nga ambasadori Donald Lu. Sipas tij Amerika zgjodhi të tërhiqej në atë moment për të mos lejuar agravimin e situatës dhe e përdori cilësimin ‘burrë shteti’ si mjet diplomatik.

Sipas analistit Berisha ka në kurriz 4 viktima dhe në demokraci po vrave dhe po vrau shteti kurrë nuk shpëton pa shpagim, sa do i fuqishëm të jesh. Për sa i përket shpalljes non grata Meçe e konsideroi si një cenim që i bën Berisha interesave gjeostrategjike amerikane në Shqipëri.

Komenti i Meçes:

“Gjatë gjithë kësaj periudhe që ka qenë periudha e zgjedhjeve dhe para zgjedhjeve është vërtetuar që Partia Demokratike operon në planin demagogjik me një kryetar, por në underground ka struktura shumë herë më të fuqishme se vetë kryetari. Çështja është kush i komandon këto struktura. Elbasani vërtetoi që strukturat paramilitare nuk kontrolloheshin fare nga kryetari i partisë, por vareshin nga dikush tjetër.

Këto struktura paramilitare përbëjnë themelin e Partisë Demokratike, që komandojnë gjithë vendimarrjen e PD-së me urdhërues. Urdhëresa arriti kulmin në ditën kur u dorëzuan listat e Partisë Demokratike për 25 Prillin, të cilat u çuan gjysmë ore me vonesë se nuk kishte dhënë urdhër shefi i madh.

Pra ta kuptojmë këtë gjë, nëse doni të dini dhe më 21 Janar ka qenë veprim diplomatik i ambasadës amerikane cilësimi si ‘burrë shteti’.

Ka një konflikt atje që mund të arrinte përmasa të mëdha dhe Amerika tha po tërhiqem unë dhe po ti je burrë shteti. Që nga ajo ditë Berisha në marrëdhëniet me ShBA-të nuk e ka ngritur më kokën, kurrë. Ka në kurriz 4 viktima së bashku me Lulzim Bashën. Ta kuptojmë në demokraci po vrave dhe vrau shteti kurrë nuk shpëton nga shpagimi, kurrë, kurrë, kurrë! Sado i fuqishëm të jesh.

Shpalljen e Berishës ‘non grata’ nuk është bërë për veprimet në Shqipëri, por e shoh në cenimin që i bën interesave gjeostrategjike në Shqipëri”, tha Meçe.