Ish-ministrja Valentina Leskaj, u shpreh e prerë se Partia Socialiste do të ishte zgjedhja e saj edhe sikur mundësia e zgjedhjes t’i jepej edhe 100 herë të tjera.
Gjatë një interviste për “Quo Vadis” në “Vizion Plus”, Leskaj tha se PS-ja është forca më progresiste, krahasuar me partitë e tjera.
“Nëse edhe 100 herë të tjera të hyja në politikë, do të hyja në PS. PS ka qenë dhe mbetet forca politike me progresive dhe që mua më përshtatej më shumë.”, – tha Leskaj.
Gjithashtu Leskaj theksoi se parlamenti i sotëm të turpëron. Si një politikane karriere, ajo bëri thirrje që partitë politike të hapin dyert për njerëz me vlera dhe të shkolluar.
Pritshmëritë e saj janë që Parlamenti i ri të mos i ngjajë këtij që kemi sot.
“Partitë politike duhet të jenë të hapura. Partitë politike kanë nevojë të demokratizohen në Shqipëri. Parlamenti i fundit ishte ndoshta Parlamenti që të bën të ndihesh i turpëruar. Shpresoj që Parlamenti i ri nuk do t’i ngjajë Parlamentit aktual, por ka nevojë të reflektohet. A ka filtra në politikë për prurjet e reja? Nuk është problem moshe. Ata që vijnë duhet të kalojnë disa filtra, duhet të vijnë nga aktivizimi, nga kontributet, nga shkollimi, duhet të ofrojnë ca vlera”, – u shpreh Valentina Leskaj.
Diskutime rreth kësaj post